Championat.asia сайти талқинига кўра, 25-турнинг энг яхши дарвозабони – Валижон Раҳимов ("Бунёдкор")

"Бунёдкор" бу турда Наманганда "Навбаҳор" меҳмони бўлиб, 2:0 ҳисобида зафар қучди. Ғалабада Раҳимовнинг ўрни беқиёс, чунки у 28-дақиқада пенальтини бартараф этди ва бу "қалдирғочлар"га қўшимча куч бағишлади. Бундан ташқари, тошкентликлар посбони баҳс мобайнида қатор вазиятларда ўзини кўрсатди. Championat.asia ижодий гуруҳи ортиқча муҳокамаларсиз айнан уни энг яхши деб топди.

Championat.asia сайти талқинида 25-турнинг энг яхши мураббийи – Илёс Зейтуллаев ("Бунёдкор")

Юқорида таъкидлаганимиздек, ортда қолган турда "Бунёдкор" сафарда "Навбаҳор"ни мағлуб этди (2:0). Бунда Илёс Зейтуллаевнинг ҳиссаси катта. Учрашувда айнан унинг тактик ишланмалари қўл келди. Шундай қилиб, Championat.asia сайти 43 ёшли мутахассисни турнинг энг яхши мураббийи сифатида эътироф этди.

Championat.asia сайти талқинига кўра, 25-турнинг энг яхши футболчиси – Имеда Ашортиа ("Бунёдкор")

"Бунёдкор"нинг "Навбаҳор" устидан қозонган ғалабасида катта саҳнага чиққан футболчи айнан Имеда Ашортиа эди. У учрашув мобайнида 2 та гол урди ва бир қатор хавфли вазиятлар яратди. Грузиялик ҳужумчи то алмаштирилгунча – 87-дақиқагача тиним билмади. Шу тариқа, Championat.asia сайти ходимлари бир қанча номзодлар орасидан айнан Имедани танлади ва тур футболчиси дея эълон қилди.

Championat.asia сайти талқинида 25-турнинг энг чиройли голи муаллифи – Усмонали Исмоналиев ("Андижон")

"Андижон" – "Шўртан" баҳсида шунчаки "отишма" юзага келди ва мезбонлар 4:3 ҳисобидаги ғалабани тантана қилди. Учрашувда Усмонали Исмоналиев дублни расмийлаштирди. Андижонликлар аъзосининг 54-дақиқада урган иккинчи голи жуда чиройли чиқди. У Абдураҳмон Комиловнинг қанотдан ошириб берган тўпини тўхтатмасдан дарвозага жойлаб қўйди. Шундай қилиб, моҳирона зарбаси орқали дарвозани ишғол қилган Исмоналиев тур голи муаллифи сифатида эътроф қилинди.

МТЖ собиқ дарвозабони, меҳмонда зафар қучган мураббий, дублга эришган ҳужумчи — Суперлигада 25-турнинг энг яхшилари