Футболчилар шу кунларда Тошкент вилоятининг Нанай қишлоғида 10 кунлик ўқув-машғулот йиғинини олиб боришмоқда. Кеча сайтимиз вакиллари шундоққина тоғ ён бағрида жойлашган сўлим қишлоқда бўлиб, ёш футболчиларнинг машғулот жараёнини кузатиб қайтдик.

17 нафар футболчи машғулот олиб бораётган йиғинга таниқли мураббий Рауф Инилеев раҳбарлик қилмоқда. Шерзод Жўраев эса Наманган спорт коллежининг 2004 йилда туғилган футболчиларига бош мураббий этиб тайинланган.

Биз кечга яқин Нанайга кириб борганимизда болалар тўп билан ишлаш машқларини бошлаб юборишган экан. "Бу ерда 10 кун давомида машғулот ўтказамиз, - дейди жамоа бош мураббийи Шерзод Жўраев. - Ҳаво яхши, футболчилар ҳам зўр бериб машқ қилишмоқда. Бу футболчиларни яқинда танлов асосида қабул қилиб олдик. Кейинчалик улардан Наманган футболи учун моҳир ўйинчилар етиштириб беришга ҳаракат қиламиз".

Шуни айтиш лозим, футболчилар бу ерда кунига икки маҳалдан машғулот ўтказишяпти. Эрталабки машғулот соат тўққизда бошланса, кечки машғулотларга соат бешдан кейин старт берилади. Ўн кунлик йиғин якунига етганидан сўнг жамоанинг Тошкентга келиб бирорта жамоага қарши ўртоқлик учрашуви ўтказиш мураббийлар режасидан ўрин олган.

Х.Холиқов.

Наманганлик футболчилар Нанай қишлоғида йиғин ўтказишмоқда (ФОТО)