- Avvalambor kechagi g'alaba bilan barchani tabriklayman. Muhim uchrashuvda kerakli natijaga erishdik. Bunday bosqichda hech qanday xato va kamchiliklar kechirilmaydi. Eng asosiysi uch ochkoni qo'lga kiritdik. Uchrashuv qiyin bo'ldi. KXDR ham oson mag'lub etiladigan jamoa emas ekanligini bilardik. Hozirgi kunda hech kimni osongina mag'lub etib bo'lmaydi.

- Qirg'izistonga qarshi uchrashuvga tayyorgarlikni boshladingizlarmi?

- Bugun ko'proq tiklanishga urg'u beramiz. Keyingi raqibimizni o'rganishni boshlaymiz. Oson o'yin bo'lmasligi aniq. Kecha qirg'izlar Eronga qarshi munosib o'yin namoyish etishdi. Guruhimizda oson raqibning o'zi yo'q.

- Bosh murabbiyimiz kecha jismoniy holat bilan bog'liq muammolarga duch kelyapmiz deb aytdi. Jismoniy jihatdan tayyorgarlik qanday kechmoqda?

- Futbolchilar bunga ko'nikib ketishgan. To'g'ri, biroz qiyinroq bo'lishi mumkin, ayniqsa parvozdan keyingi jarayon. Hozir yana uch vaqtimiz bor. Shu vaqt ichida tayyor bo'lib olishimiz kerak.

- So'nggi marotaba Qirg'iziston terma jamoasi bilan Osiyo kubogidan oldingi yig'inda nazorat o'yinini o'tkazgan edik. Shu vaqt ichida raqib qanchalik o'zgargan bo'lishi mumkin?

- 7 oy ham ancha katta muddat. Raqibimiz jismoniy va taktik tomonlama kuchaygan deb o'ylayman.

- Kecha guruhimizdagi boshqa jamoalar qayd etgan natijalar haqida gapirib o'tsangiz. Qatar - BAA uchrashuvi ko'pchilikning etiborini tortdi.

- Oson raqib yo'q ekanligiga yana bir bor guvoh bo'ldik. Kecha Janubiy Koreya Falastinni mag'lub eta olmadi, Bahrayn Avstraliyani mag'lub etib qo'ydi. Hozirgi kunda o'yinga yaxshi yondashmasangiz, har qanday raqibga yutqazib qo'yish mumkin.

Abbosbek Fayzullaev: "Hozirgi kunda oson raqibning o'zi yo'q. Kechagi natijalar bunga isbot bo'ldi"