Kuni kecha “Ruxsor” telekanali ijodkorlari Quvasoydagi “Cementchi” klubining bazasiga tashrif buyurishdi va jamoa ustozi Abdumalik Hakimovdan intervyu olishdi.

- Birinchi davradagi ishtirokimizni yomon baholamagan bo'lardim,-deb gap boshladi murabbiy. Lekin bizning rejalarimiz boshqacha edi. Afsuski, bazi uchrashuvlarda ochko yo'qotdik. Ayni paytda Samarqandning “Dinamo” jamoasi peshqadam bo'lib turibdi. Biroq ikkinchi davrada biz yana birinchi o'rinni qaytarishga harakat qilamiz.

- Tayyorgarlik jarayoni qanday kechmoqda ? Ko'rikda kimlar bor?
- Ko'rib turganingizdek, tayyorgarlik jarayoni o'z qarorgohimizda davom etmoqda. 20 dan ortiq o'yinchilar ko'rikda bo'lib turishibdi. Ular ichidan eng yaxshilarini saralab “Cementchi”da olib qolishga harakat qilamiz.

- Birinchi liga bahslarida Farg'ona viloyati sharafini himoya qilayotgan “Cementchi” hamda “Yozyovon-Lochinlari” jamoalari safida ham Oliy liga saviyasidagi iqtidorlar bormi ?
- Albatta bor. Agar kuchlilar safidan o'yinchilarimizga takliflar bo'lsa, bundan faqat xursand bo'lamiz. Quvasoy va Yozyovonda bunday iqtidorlar juda ko'p. Faqat ular bilan ishlash kerak. Agar o'yinchi bosh murabbiyning futbol falsafalarini tushunib, jamoaga kirishib ketadigan bo'lsa, buning qiyin joyi yo'q.

- Aytingchi, Birinchi liga etakchisi hisoblangan “Cementchi” klubi bilan “Neftchi” jamoasi o'rtasida futbolchilarni Oliy liga klubi safiga etishtirib berish borasida qandaydir tizim bormi?
- Aslida bizning asosiy vazifalarimizdan biri iqtidorli futbolchilarni Farg'ona bosh jamoasi “Neftchi” klubiga etishtirib chiqarish hisoblanadi. Lekin u tarafdan taklif bo'lmasa, biz nima ham qilardik ? Faqat “Yozyovon-Lochinlari” klubidan “Neftchi” safiga o'yinchilar taklif qilganliklaridan xabarim bor. O'tgan yili ajoyib mavsum o'tkazib, to'purar bo'lgan Elyor Akbarovni “Neftchi”ga taklif etilishint juda kutgandik edi. Biroq amalda bunday bo'lmadi. Shundan so'ng uni Navoiyning “Qizilqum” jamoasi taklif qildi va Elyor taklifni qabul qilgan holda jamoasini o'zgartirdi. Yana bir bor takidlayman, asosiy vazifalarimizdan biri farg'onalik iqtidorlarni kashf etish hamda “Neftchi”ga munosib nomzodlarni tarbiyalashdir.

- Ochiq ayta olasizmi, Oliy ligaga chiqish maqsadi bormi ?
- “Cementchi” Oliy ligaga chiqishga intilayotgan jamoadir. Biz hali endi shakllanayotgan jamoamiz. “Cementchi” futbol klubi tashkil topganiga endi 2 yil vaqt bo'ldi. Bu vaqt ichida bitta jamoani haqiqiy futbol klub maqomiga olib chiqish qiyin. Yaxshi bir jamoani tashkil qilish uchun kamida 3 yil vaqt kerak bo'ladi. Bizdan avvalgi “Cementchi” klubi 7 yilda Oliy liga yuzini ko'rgandi. Afsus, bu jamoa kuchlilar safida uzoq o'ynamadi. Lekin buning o'ziga yarasha sabablari bor.

- Quvasoylik muxlislar haqidagi fikringizni tinglasak.
- Bu muxlislar haqidagi fikrlarim faqat ijobiy deb aytish mumkindir. Ko'p safar o'yinlarida muxlislik madaniyatiga amal qilmaydigan ishqibozlarni ko'raman. Lekin bizning muxlislarimiz chiroyli futbol tarafdori va ular bahs yakunlangach hamisha maydonda harakat qilgan xar ikkala jamoa vakillarini olqishlar kuzatib qo'yishadi. Albatta bu quvonarli holatdir, - dedi murabbiy “Ruxsor” telekanaliga bergan intervyusida.

Hojiakbar Jabborov

Abdumalik Hakimov: “Farg'onalik iqtidorlarni kashf etish niyatidamiz”