Суперлига стартида иккита дуранг билан чекланган қаршиликлар БААда маҳаллий "Банияс" жамоаси меҳмони бўлади. Бу оқшомда ОЧЛ гуруҳ босқичига чиқиш масаласи узил кесил ҳал қилинади. Йўлланма фақат битта ўйинда қўлга киритилади. Қуйида бугунги беллашув олдидан фикр ва мулоҳазаларимизни билдириб ўтамиз.

⚡️ MATCH DAY. "Насаф" ёки "Банияс"?

"Насаф" ва "Банияс"даги вазият

Рўзиқул Бердиев шогирдлари шу кунга қадар учта расмий ўйинда қатнашишга улгуришди. Дастлаб Суперкубокда "Пахтакор"га имконият берилган бўлса, "Навбаҳор" ва "Металлург" билан муроса кўчасини танлади. Жамоа ҳали тўлиқ формага кириб олмагани яққол кўриниб турибди. Боз устига футболчиларда аввалги ўйинлардаги руҳият ҳали ҳамон сақланиб қолмаган бўлса бўлгани. "Насаф"нинг рақиби "Банияс" БАА чемпионатида 10 март куни 19 тур ўйинида майдонга тушиб "Ал Наср"ни 2:1 ҳисобида мағлуб этди. Айни пайт турнир жадвалида 28 очко билан 6 ўринда кетмоқда.

"Сўғдиёна"на "Насаф"га мухлислик қилади

"Насаф" мағлубиятга учраган тақдирда ОФК кубоги орқали халқаро майдондаги юришини давом эттиради. Биз бу билан ҳозирданоқ уларни ОЧЛдан четга чиқариб қўймоқчи эмасмиз. Лекин ушбу фактор "аждарлар"нинг босимсиз тўп тепишларини таъминлайди. Чунки халқаро майдонда имконият йўқотилмаган бўлади. Кечаги матбуот анжуманида Рўзиқул Бердиев гуруҳ босқичига чиқиш учун иштиёқ катта эканлигини таъкидлади. Ўтган мавсум Суперлигада иккинчи ўринни олган "Сўғдиёна" бугун астойдил "Насаф"нинг ғалабасини кутади. Ҳамюртларимизнинг БААдан ютуқ билан қайтиши ўз-ўзидан жиззахликлар учун халқаро майдон эшикларини очади. Улар ОФК кубогида юртимиз шарафини ҳимоя қилишлари мумкин бўлади.

ОЧЛ. Рўзиқул Бердиев: "Эртага гуруҳ босқичига ўтиш иштиёқида майдонга тушамиз"

"Банияс" ҳақида

Ушбу клуб 1982 йилда ташкил топган. Уй учрашувларини 10 000 сиғимга эга "Банияс" аренада ўтказади. Жамоани руминиялик Даниэль Исэйлэ бошқармоқда. Маълумот ўрнида айтиш мумкинки, 2011 йил қисқа вақт франциялик футбол юлдузи Давид Трезеге тўп тепган. Айни пайтдаги ҳолатга кўра, Саша Ивкович (Хорватия), Салим Ал Мамари (Уммон), Саиле (Бразилия), Гастон Алварез Суарез (Аргентина), Георге Тибар (Танзания), Николас Химинес (Аргентина), Жоао Виктор (Бразилия), Исаак Телин (Швеция), Саид Хамис (Танзания) каби легионерлар жамоада ўйнамоқда. Жамоанинг ўртача ёши 25,7. Ўтган мавсум амирликлар чемпионатида 2 ўринни эгаллади.

Жамоанинг уй стадиони "Банияс" арена

Фото: Клуб расмий сайтидан олинди

Ироқлик Ал Қайси 2021 йил АГМКни, бу йил "Насаф"ними?

Бугунги ўйинни бошқариш чеки ироқлик ҳакам Али Сабаҳ Аддай Ал Қайсига ишониб топширилган. Қизиқ ҳолат шуки, ушбу рефери аввалги мавсумда Қатарда кечган "Ал Гарафа" - АГМК ўйинини бошқарганди. Ўшанда олмалиқликлар экстра-таймларнинг сўнгги сонияларида Жокичнинг голи эвазига Доҳадан ғалаба ва ОЧЛ гуруҳ босқичи йўлланмаси билан қайтган эди. Кўрамиз, бугун Ал Қайси қайси жамоани олиб чиқар экан?

БАА клубларига қарши статистика ва уч йилдан сўнг қайтиш

"Насаф" ОЧЛда сўнгги бор 2018 йил гуруҳ босқичида қатнашган. Қизиғи турнирдаги сўнгги ўйин айнан БАА клубига қарши кечганди (Ал Васл - "Насаф" 1:2). Жамоа ҳозиргача БАА клублари билан ўзаро 9 маротаба тўқнаш келган. 3та ўйинда Қарши клуби зафар қучган бўлса, 2тасида дуранг қолган 4та беллашувда рақиблар ғалабани ўз томонига оғдирган, дея оламиз.

10.02.2002. "Ал Ваҳда" - "Насаф" 1:2
07.03.2012. "Насаф" - "Ал Жазира" 2:4
02.05.2012. "Ал Жазира" - "Насаф" 4:1
18.03.2015. "Ал Аҳли" - "Насаф" 0:0
07.04.2015. "Насаф" - "Ал Аҳли" 0:1
19.04.2016. "Насаф" - "Ал Айн" 1:1
03.05.2016. "Ал Айн" - "Насаф" 2:0
20.02.2018. "Насаф" - "Ал Васл" 1:0
16.04.2018. "Ал Васл" - "Насаф" 1:2

"Аждарлар" тўққизинчи тўқнашувга тайёрми? "Банияс" - "Насаф" учрашувига превью