"Diario Sport"нинг хабарига кўра, каталон клуби январда 31 ёшли футболчи билан янги шартнома бўйича келишувга эришишни ният қилган. Футболчининг амалдаги шартномаси 2023 йилгача мўлжалланган.

Алонсо "Барселона"да қолмоқчи, клуб раҳбарияти ҳам футболчи кўрсатаётган ўйиндан мамнун. Ўтган ёз Маркос "кўк-анорранглилар" сафига бориб қўшилиш учун маоши кескин камайишига рози бўлган. Ўшанда томонлар 2023 йилгача мўлжалланган шартнома имзолашган ва клуб агар Маркос ўзини яхши томондан кўрсата олса, маош миқдорини ошириш, янги келишув имзолашни ваъда қилганди.

Энди "Барселона" Алонсо билан яна икки йиллик келишув имзоламоқчи. Ҳужжат 2 йил, ёки "1+1" схемасида имзоланади. "Барселона"га иккинчи вариант кўпроқ ёқса, футболчи бир йўла икки йиллик маошни нақд қилиш истагида.

Баъзи масалалардаги мунозараларга қарамай, томонлар янги шартномага жиддий тўсиқ кўришмаяпти.

Шунингдек, "Барселона" Алекс Бальде билан ҳам шартнома муддатини узайтирмоқчи. Айнан Бальде ва Алонсо орқали клуб ҳимоянинг чап қанотини "ёпмоқчи". Шартномаси 2024 йилгача мўлжалланган Хорди Альба билан эса Херар Пике билан бўлгани каби хайрлашишмоқчи.

Бу мавсум Алонсо клуб сафида барча мусобақаларда 12 ўйинда 1 та гол уришга муваффақ бўлди.

"Барса" Алонсо билан шартномани 2 йилга узайтириб, Альба билан хайрлашмоқчи