Franciyaning PSJ klubi bugun Myunxenda mehmon bo'ladi. Tarixga nazar solsak, mazkur jamoalar bugunga qadar yashil maydonda 9 bor to'qnash kelganiga guvoh bo'lamiz (rasmiy bahslar).

Ulardan 5 tasida francuzlarning, 4 tasida nemislarning qo'li baland kelgan. To'plar nisbati - 12:12.

Fakt: "Bavariya" va PSJ o'rtasidagi bahslarda hech qachon durang natija qayd etilmagan.

Eng yirik hisob 1997 yilning 22 oktyabrida o'tkazilgan o'yinda qayd etilgan. O'shanda nemislar 5:1 hisobida g'alaba qozonishgan bo'lib, "Bavariya" safida Jovane Elber va Karsten Yanker dublga erishgan, jamoa sardori Tomas Xelmer esa 1 ta golga mualliflik qilgan edi.

Jamoalar o'rtasidagi so'nggi o'yin yodingizda bo'lsa kerak. ECHL o'tgan mavsumining final bahsi taqdirini Kingsli Komanning yagona goli hal qilgan edi. Bugungi uchrashuv esa nemis va francuz grandlari o'rtasidagi 10-si bo'ladi. Qadrli muxlis, bo'lajak o'yindan qanday natija kutyapsiz?

"Bavariya" PSJ darvozasiga beshta gol urgan o'yinni eslaymiz (+umumiy statistika)