Bugungi Superligaga qura tashlash marosimidan so'ng bosh murabbiy Baxtiyor Ashurmatov o'z fikrlari bilan o'rtoqlashdi.

“Gapning ochig'i, bundan oldingi mavsumlarda AGMK jamoasida ham ishlaganman. 2019 yil boshida “Buxoro”ni qabul qilib olganimdan keyin birinchi turni sobiq jamoamga qarshi o'tkazgan edim. Taqdir tasodifini qarangki, ketma-ket ikkinchi yildirki mavsumni yana avval faoliyat olib borgan jamoamga qarshi o'yin bilan boshlayapman. Albatta, bu qiziq holat. Qaysidir manoda men uchun kutilmagan sovg'a ham bo'ldi. Aytib o'tilganidek, birinchi davra yakuniga qadar Superligadagi barcha jamoalar bilan o'ynab chiqamiz. Shuning uchun raqib tanlashimiz biroz noto'g'ri bo'lardi. O'ylaymanki, “Buxoro”ga qarshi uchrashuv stadionga keladigan muxlislar uchun qiziqarli bo'ladi. Marosim yuqori darajada o'tkazilganini alohida takidlagan bo'lardim. Bir-biriga munosib raqiblar ilk turda o'zaro to'qnash kelmoqda. Masalan, turning markaziy bellashuvi sifatida “Paxtakor” va “Navbahor” ishtirokidagi o'yinni misol qilib keltirish mumkin”, – dedi “Qo'qon-1912 bosh murabbiyi.

Baxtiyor Ashurmatov: “Ikkinchi yildirki, mavsumni sobiq jamoalarimga qarshi o'yin bilan boshlayapman”