Kimlar musobaqa bilan xayrlashdi?

Yil boshida kutilmaganda “Neftgazmontaj” va “Lochin” klublari moliyaviy tomonlama qiyinchilikka duch keldi. Natijada, ikkisi ham musobaqadagi yurishini yakunlay olmadi va ishtirokchilar orasidan chiqarildi. Natijada, 14ta jamoa musobaqani davom ettirishiga to'g'ri kelmoqda. Sir emaski, har yili birinchi ligada kamida bir yoki ikki klub moliyaviy qiyinchilik fonida ligadagi ishtirokini davom ettira olmayapti. Bu esa har yili davom etmoqda.

Pro liga uchun kurash avjiga chiqdi
Diqqat qiling, bu yilgi birinchi liga o'yinlari ancha o'sdi. To'g'ri, muammolar kuzatilmoqda. Lekin Pro liga uchun kurashayotgan jamoalar soni birmuncha oshgan. Deylik, hozirda “Navbahor-FARM”, “Shahrixonchi”, “Aral”, “Andijon II” va “Paxtakor-79” jiddiy maqsadlarni qo'ygan. O'tgan yilda “Zomin” va “G'ijduvon” Pro ligaga kurashgan edi. Bu yil esa ular soni ortdi. Ayniqsa, vodiy klublari ancha faol ekanligi ko'zga tashlanmoqda. “Shahrixonchi” yaxshi homiy topgan ko'rinadi, davralar oralig'ida tarkibni kuchaytirdi. Mo'ydin Mamazulunov, Eldor Ergashev va Jamshid Qobulov singari futbolchilar taklif etildi. “Aral” esa Nemattilo Qutiboev qo'l ostida juda yaxshi jamoa shakllantirmoqda. Asosan mahalliy yoshlar hisobiga barpo qilingan jamoa natijalari yaxshi. Moliyaviy tomonlama ham ancha ijobiy tomoni bor. Jamoaning asosiy maqsadi – Pro ligaga qaytish. “Andijon II” esa kubok bahslarida “Olimpik”ni taslim qilib, katta shov-shuv ko'targandi. Jamoa ham yoshlardan iborat ekanini hisobga olsak, Pro ligaga yo'llanma olish, tarkibdagi futbolchilarning o'sishiga xizmat qilishi tabiiy.

Endi peshqadam “Navbahor-FARM” haqida gaplashsak. O'tmishning mohir futbolchisi bo'lgan Rashid G'ofurov murabbiylik qilayotgan ushbu jamoa chindan ham yaxshi o'yinchilarni jamlay olgan. Har holda ular turdan-turga yaxshi natijalar qayd etib boryapti. Maqsadlar jiddiy ekani ko'zga tashlanmoqda.

Turnir jadvaliga qarasak, namanganliklar 39 ochko bilan peshqadam bo'lib turibdi. “Shahrixonchi”, “Paxtakor-79” va “Aral” hisobida 35tadan ochko mavjud. “Andijon II” esa 34 ochko jamg'argan holda, yuqorida turgan jamoalarni taqib qilib kelmoqda. Ko'rinib turibdiki, Pro liga uchun kurash so'nggi turga qadar davom etadi. Har holda birinchi ligada ham birorta o'yin o'tkinchi o'tmayapti.

Qolgan jamoalarda holat qanday?
Birinchi liga o'yinlari Superliganing farm jamoalari uchun yaxshi amaliyot deyish mumkin. “Qizilqum-FARM”, “Nasaf-FARM” va “Bundyokor-FARM” o'z tarbiyalanuvchilarini musobaqadagi o'yinlari bilan toblantirmoqda. “Yunired” klubi esa xorijlik homiyga ega va asosan yoshlar bilan o'ynamoqda. Malum bo'lishicha, klub kelasi yildan o'z oldiga yuqoriroq vazifalar qo'yishni rejalashtirgan. Moliyaviy muammolari borligiga qaramay, o'z ishtirokini davom ettirayotgan “Do'stlik-Oltiariq” va “Do'stlik-Toshkent” klublari natijalari yomon emas. “Qumqo'rg'on-1977”dan yuqori natijalar kutilgan edi. Biroq jamoa o'ziga o'xshamayapti. Vali Keldiev bosh murabbiy sifatida taklif qilinganiga qaramay, jamoa 12-o'rinni egallab turibdi. “Chig'atoy” va “Lokomotiv-BFK” esa yoshlardan iboratligi bois, ularga natijadan ko'ra, o'yin amaliyoti muhimroq. Xullas, Birinchi liga – 2022 birmuncha o'sgan va unda qayd etilayotgan natijalar ham o'z tasdig'ini topmoqda.
Keyingi tur uchrashuvlari

1 oktyabr
16:00. “Shahrixonchi” – “Do'stlik-Toshkent”
16:00. “Yunired” – “Andijon II”
16:00. “Do'stlik-Oltiariq” – “Paxtakor-79”
2 oktyabr
16:00. “Qumqo'rg'on-1977” – “Nasaf-FARM”
16:00. “Qizilqum-FARM” – “Bunyodkor-FARM”
17:00. “Chig'atoy” - “Lokomotiv-BFK”
17:00. “Navbahor-FARM” – “Aral”

Samandarbek tayyorladi

Birinchi ligada nima gaplar?