Samarqandning "Dinamo" klubi o'z maydonida "Bunyodkor"ni qabul qiladi. O'yin ahamiyati ikkala jamoa uchun ham yuqori. Ayniqsa, "Dinamo" uchun. Chunki bu jamoa ikkinchi davra boshlanganidan beri oltita o'yinda maydonga tushgan bo'lsa, hali biror martayam gol ura olmadi.

Umumiy hisobda "Dinamo" futbolchilari sakkizta o'yindan beri to'p kirita olishmayapti. Mana shu sakkizta uchrashuvdagi to'plar nisbati 0-7. Albatta, oliy liga klubi uchun bu achinarli ko'rsatkich. "Dinamo"da o'zi gol uradigan futbolchi bormi degan savol yuzaga keladi.

Bugun esa maydon egalarini yana bir jiddiy raqib kutmoqda. Mirjalol Qosimov qaytganidan beri "Bunyodkor" ancha o'zgardi. Jamoa ikkinchi davrada mag'lubiyatsiz davom etmoqda: to'rtta g'alaba va ikki durang. Katta ehtimol bilan "Bunyodkor" bugun ham yutqazmasa kerak.

Bilasizmi? "Dinamo" oxirgi ikki o'yinni durang bilan yakunladi. "Buxoro" va "Qo'qon-1912"ga qarshi bahslar 0:0 hisobida tugadi. "Bunyodkor" esa ketma-ket uchta g'alabadan so'ng safarda "Qizilqum" bilan 3:3 o'ynadi.

Fakt: "Bunyodkor" ikkinchi davrada hozircha oltita o'yinda maydonga tushib, shundan beshtasida gol o'tkazmadi. "Dinamo"da esa buning aksi: oltita o'yinda birortayam gol yo'q.

Bugun futbol. Ikkinchi davrada hali gol urmagan "Dinamo" "Bunyodkor"ni qabul qiladi