Турнир жадвалининг 13-поғонасида бораётган "Бухоро" 5-ўринга кўтарилиб олган "Сўғдиёна" билан баҳс олиб боради. Шуни айтиш керак, "Бухоро" иккинчи даврада ҳали ғалаба нашидасини сургани йўқ. Жамоа икки бор мағлубиятга учраб, бир марта дуранг қайд этди.

"Сўғдиёна" эса аксинча, худди "Пахтакор" каби кетма-кет учта ғалабага эришди. Жиззахликлар аввалига "Локомотив"ни 1:0, ундан кейин меҳмонда "Қўқон-1912"ни 2:1 ва уйда "Қизилқум"ни 1:0 ҳисобида мағлуб этишди.

"Бухоро" уйдаги ўйинларда очко йиғиш бўйича ҳам қуйида боряпти. Жамоа атиги битта баҳсда зафар қучган ва бу ғалаба биринчи давранинг охирги турида "Андижон" (1:0) устидан қўлга киритилган. Бундан ташқари "Бухоро" уйдаги учрашувларда энг кам гол урган жамоа бўлиб турибди. Тўплар нисбати 4-11.

Бугунги қарама-қаршиликнинг яна бир эътиборга молик жиҳати Улуғбек Бақоев "Сўғдиёна" бош мураббийи сифатида собиқ жамоасига қарши баҳс олиб боради. Бу ҳам ўйинга бўлган қизиқишни ошириши шубҳасиз. "Сўғдиёна" шу пайтгача сафар ўйинларида икки бор зафар қучган. Жамоа Қўқонда ғалаба қозонганини юқорида айтиб ўтдик. Яна бир ғалаба Олмалиқда АГМК устидан қўлга киритилган.

Бугун "Бухоро" ғалаба учун бор кучини ишга солиши шубҳасиз. Йўқса Муҳсин Муҳаммадиев жамоаси хавфли зонада қолиб кетади. Ўз навбатида "Сўғдиёна" иккинчи даврадаги қаторасига уч ғалаба тасодиф эмаслигини исботлашга ҳаракат қилади.

Coca Cola Суперлигаси. 17-тур. 17 август

«Бухоро» - «Сўғдиёна»

Ҳакамлар: Ҳасан Рўзиев, Олимжон Абдувосилов, Ришат Нўъмонов, Комил Расулов.

Назоратчи: Арслон Ҳотамов

Комиссар: Жаҳонгир Раҳматуллаев

Бошланиш вақти 19:15.

Бугун футбол. Иккинчи даврада ҳали ютмаган "Бухоро" кетма-кет учта ғалабага эришган "Сўғдиёна"га қарши