Мавсум бошида юқори ўринларни мақсад қилган "Навбаҳор" сафарда "Андижон" меҳмони бўлади. Водий дербиси бўлгани учун бу баҳс ниҳоятда қизиқ кечиши кутиляпти.

Турнир жадвалида "Андижон" 16 очко билан 10-ўринни эгаллаб турибди. "Навбаҳор" эса 22 очко тўплаган ва 6-ўринда боряпти. "Андижон"нинг иккинчи даврадаги натижалари чакки эмас: учта ўйиндан иккитасида ғалаба қозониб, бир бор дуранг ўйнади. Айниқса "Андижон"нинг ўтган тур Бекободдан ғалаба билан қайтиши ўзига хос сенсация бўлди. Бугун андижонликлар ўтган турдаги ғалаба тасодиф эмаслигини исботлашга ҳаракат қиладилар.

"Навбаҳор" эса негадир ўзини кўрсата олмаяпти. Бу жамоа Канчельский пайтида анча томошабоп футбол намойиш этарди. Лекин янги мураббий келганидан бери "Навбаҳор" иккинчи даврада ҳали ғалаба нашидасини сургани йўқ. Жамоа икки бор мағлубиятга учраб, бир ўйинда дуранг қайд этди.

Бугунги баҳсда томонларнинг имконияти тенг баҳоланмоқда. Албатта, "Андижон" ўз уйида ўйнайди ва уйда деворлар ҳам ёрдам беради деган гап бекорга айтилмаган. Лекин "Навбаҳор" сафарда қандай тўп тепиш кераклигини билади. Қолаверса бу жамоа фақат уч очкони кўзлаб ҳаракат қилса керак.

18:00. «Андижон» - «Навбаҳор»

Ҳакамлар: Виктор Серазетдинов, Тимур Галеев, Равиль Шояхметов, Олим Тўйчибоев.

Назоратчи: Ноил Лутфуллин

Комиссар: Сардор Қудратуллаев

Бугун футбол. Иккинчи даврада ҳали ютмаган "Навбаҳор" "Андижон" меҳмони бўлади