Бу ўйинда жароҳат туфайли Сардор Рашидов, Карлес Кото, Бобир Акбаров, Анвар Ғофуров сингари футболчилар майдонга тушишмади.

Тўғри, Анвар Ғофуров захирадагилар рўйхатига киритилди, аммо унда ҳам жароҳат бор бўлиб, футболчи чигалёзди машқларида ўзини кўп уринтирмади. “Бунёдкор” футбол клуби шифокори Қаҳрамон Нурмуҳаммедов билан боғланиб, жароҳат олган ўйинчиларнинг қачон сафга қайтиши борасида сўраганимизда шундай жавобни олдик.

“Карлес Кото жароҳатидан қутулиб, алоҳида югуришни бошлади. Лекин у ҳали умумий гуруҳга қўшилгани йўқ. Сардор Рашидов сафарда “Динамо” билан кечган ўйинда жароҳат олганди, шу боис уйда “Локомотив”га қарши баҳсни ўтказиб юборди. Унга уйига бориб дам олиб келиши учун мураббийлар жавоб беришганди, ярим ҳимоячи эртага қайтиб келади. Кейин эса югуришни бошлайди. Анвар Ғофуров билан Бобир Акбаровнинг жароҳати эса у қадар жиддий эмас. Улар енгил машқлар орқали ўз формаларини тиклаб олишяпти” - дейди “Бунёдкор” шифокори.

Маълумки, келаси ҳафтанинг чоршанба куни “Бунёдкор” сафарда “Ал Жаиш”га қарши ўта муҳим беллашувда майдонга тушади. Бу ўйинда исталган ҳисобдаги ғалаба тошкентликларни ОЧЛнинг кейинги босқичига олиб чиқади. Шуни ҳисобга олиб, “Бунёдкор” ўзининг тўлиқ таркибида Қатарга йўл оладиган бўлса, ижобий натижадан умид қилиш мумкин.

Хайрулла Холиқов.

“Бунёдкор”нинг жароҳат олган ўйинчилари қачон сафга қайтади?