Gollarga boy o'tgan uchrashuvda omad Ivan Boshkovich shogirdlariga kulib boqdi. Yakunda esa "So'g'diyona" yuz foizlik natija bilan keyingi bosqichga yo'llanmani qo'lga kiritdi. Uchrashuvdan so'ng jamoaning tajribali futbolchisi Stanislav Andreevning fikrlari bilan qiziqdik.

- Stanislav "Paxtakor" ustidan qo'lga kiritilgan g'alaba haqida fikrlaringiz. Superliga va kubokda ketma-ket ikki bor bu ish uddasidan chiqildi...

- Uchrashuvning katta qismida ko'pchilikni tashkil qilgan bo'lsakda o'zimizga-o'zimiz qiyinchilik yaratdik. "Paxtakor" qanday holatda bo'lmasin kuchli va xalq jamoasi hisoblanadi. Ular bilan o'yinlar oson o'tmagan.

- Gol urdingiz va assist qayd etdingiz. Golni nishonlaganingiz yo'q. Bu "Paxtakor"ga ko'rsatilgan hurmatmi?

- "Paxtakor"da uzoq yillar to'p tepganman. Bu o'yin, nima ham qila olardim. Hozir "So'g'diyona" futbolchisiman.

- Ikkinchi bo'limda "So'g'diyona" o'yin sifati tomonlama umuman o'zgardi. Tanaffusdan keyin nima sodir bo'ldi?

- Fikrimcha, ruhiy tomondan erta xotirjamlikka berildik. Raqib bundan foydalanib yana bitta to'p kiritdi. Yuqorida aytganimdek muammoni o'zimiz yaratdik.

- Sizning poziciyangiz ko'proq kuch va tezlik talab qiladi. 35 yoshda o'zingizni qanday his qilyapsiz?

- Mashg'ulotlarni har kuni to'g'ri olib borsangiz qiyinchilik tug'dirmaydi. Mashg'ulotda qiynalsangiz o'yinda oson bo'ladi.

- Jamoa guruhdan chiqdi. "So'g'diyona" qaysi bosqichgacha borishni maqsad qilgan?

- O'zbekiston kubogi mavsumni sovrin bilan yakunlash uchun eng qisqa yo'l hisoblanadi. Qolaversa, kubok g'olibi OCHLga yo'llanma oladi. Rahbariyat oldimizga maksimal vazifani qo'ygan.

- Mish-mishlarga qaraganda "So'g'diyona" kubokni yutsa, rahbariyat futbolchilarga avtomobil sovg'a qilar ekan...

- Ochig'i bu haqida sizdan eshitib turibman. Mening xabarim yo'q. Mish-mishlar doim bo'lib turadi.

Intervyu. Stanislav Andreev: "Paxtakor" har qanday holatda ham kuchli raqib. "So'g'diyona" kubokni yutishni maqsad qilgan"