Debyut mavsumidayoq jamoa bilan Superligada bronza medallariga ega chiqdi, o'z gollari bilan olmaliqliklarning g'alabalariga munosib hissa qo'shdi. Chempionatda Vatsadze 21ta o'yinda maydonga tushib 5ta gol urgan hujumchi qishda jamoasini o'zgartirish arafasida turibdi. Avvalroq saytimizda uning "Qizilqum" bilan og'zaki kelishuvga erishgani haqida xabar chiqqan edi. Biz esa futbolchining bu boradagi fikrlari bilan qiziqdik.

- Mate, 2020 yilgi mavsum legioner sifatida sizda qanday taassurot qoldirdi?

- O'tgan mavsum barchamiz uchun og'ir kechdi. O'ylaymanki, xudo xohlasa tez orada pandemiya butkul ortga chekinadi. Yil boshida oldimizga sovrinli o'rinlardan birini qo'lga kiritish vazifa qilib qo'yilgandi. Futbolchilar, murabbiylar shtabi birgalikda vazifani ajoyib tarzda bajardik deya olaman. "Nasaf"ga esa qoyil qolmasdan iloj yo'q, ular ikkinchi davrada bizga qaraganda muhim bo'lgan ochkolarn jamg'arishdi. Shuning uchun uchinchi o'rinni yomon natija hisoblamayman. Klub rahbarlari ham qoniqish hosil qilishdi. Jamoa bilan ajoyib mavsum o'tkazganimdan xursandman.

- AGMKda sizga manzur kelgan va kelmagan besh jihatni ayta olasizmi?

- Albatta, birinchi galda jamoaga kelgan ilk kunimdayoq muxlislar va futbolchilar iliq qarshi olishdi. Jamoadoshlarim moslashishimda katta yordam berishdi, uchinchisi biz mavsumni sovrindorlar qatorida tugatdik. To'rtinchi jihat klubdagi barcha proffessional ekanligi va o'z ishiga astoydil yondashishi, beshinchi ijobiy tomoni esa muxlislarning qo'llab-quvvatlashidir. Hatto qiyin kunlarimizda ham bizga dalda bo'lib turishganini unutmayman.

- O'zbekiston kubogi finalida "Paxtakor"ga yirik hisobda mag'lub bo'ldinglar, undan avval esa chempionat doirasida ham shunday natija qayd etilgandi. Birinchi davrada esa aksincha raqib maydonida kechgan uchrashuv 2:2 hisobidagi durang natija bilan yakunlangandi. "Paxtakor" haqiqatdan ham O'zbekistonning eng kuchli jamoasimi?

- Ha, "Paxtakor" ayni paytda O'zbekistonda barchadan kuchli. Bejiz ular ketma-ket ikkinchi yil kubok va chempionatda g'olib chiqishmadi. Deyarli hamma o'yinda g'alaba qozonishdi.

- Shunday ekan nima sababdan jamoani tark etishga qaror qildingiz?

- Hech qanday sababi yo'q. Shunday bo'lib qoldi.

- Joriy yilgi mavsumni "Qizilqum"da boshlashingiz qay darajada haqiqatga yaqin?

- Balki bo'lishi mumkin. Lekin hali hech kim bilan shartnoma imzolamadim.

Abdulaziz Iskandarov suhbatlashdi

Mate Vatsadze: "AGMKni tark etishimning sababi yo'q. "Nasaf"ga qoyil qoldim. Uchinchi o'rin barchani qoniqtirdi"