Мираброр Зуфарович ўз сўзида катта ва аҳил «Бунёдкор» жамоасини улкан муваффақият билан қутлади: «Ўта мураккаб кечган футбол мавсуми якунида бошқа жамоаларга нисбатан кучлироқ эканини амалда исботлаган «Бунёдкор» ҳақли равишда мамлакат чемпионлигини қўлга киритди. Сўнгги турда нафақат чемпионлик, балки қолган совринли ўрин соҳибларининг аниқланиши ҳам олий лигада «интрига»ни сақлаб турди.

Ўзбекистон кубоги баҳсларида ҳам «Бунёдкор» ўз сўзини айтди. Менга айниқса, жамоа ҳужумчиси Александр Пишурнинг ўйини ёқди. Жамоа ғалабаларида украиналик футболчининг ҳиссаси катта бўлди. Миллий терма жамоамизга ана шундай ҳужумчи етишмади. Мураббийлар уни терма жамоага чақириш вариантларини ўйлаб кўришса бўларкан.

Шу ўринда «Бунёдкор»ни бу ғалабаларга етаклаган Миржалол Қосимов ҳақида ҳам илиқ фикрлар билдирмоқчиман. Бу инсонни қўллаб-қувватланглар. Шубҳасиз, жамоанинг муваффақиятли иштирокида клуб бош ҳомийсининг ўрни бўлак. Фурсатдан фойдаланиб, «Ўзбекнефтегаз» миллий холдинг компанияси ва унинг раиси Шокир Файзуллаевга ўз миннатдорчилигимни билдираман. «Ўзбекнефтегаз» миллий холдинг компанияси битта «Бунёдкор» эмас, олий лиганинг бир йўла 7та клубига ҳомийлик қилиб келяпти. Бу жуда катта иш. Олий лиганинг тенг ярим жамоасига битта ташкилот ҳомийлик қилмоқда.

Сўзим сўнггида келаси йили ОЧЛнинг гуруҳ баҳсларида тўғридан-тўғри иштирок этадиган «Бунёдкор» жамоасига омад тилаб қоламан. Бу жамоа мунтазам равишда гуруҳ босқичидан «плей-офф»га йўл оляпти. Ният қилайлик, чемпионимиз келаси мавсум қитъанинг бош турнирида ғолиб бўлсин.

Мана куни кеча биз Куала-Лумпур шаҳрида бўлиб ўтган ОФКнинг йил лауреатларини тақдирлаш маросимида иштирок этиб қайтдик. У ерда Осиё футболи раҳбарлари билан гаплашдик. Улар 2015 йилда бизга кенг имкониятлар эшикларини очишяпти. Режага кўра, ОФКнинг 47та аъзо федерацияси иштирокидаги катта йиғилишни Тошкентда ўтказамиз. Шахсан менинг келаётган йилдан умидим катта. ОФКдагилар бизнинг тўғри ривожланиш йўлидан кетаётганимизни эътироф этишяпти», - деди ЎФФ раҳбари.

Мираброр Усмонов: "Пишурни Ўзбекистон термасига жалб этиш ҳақида ўйлаб кўриш керак"