Gap "Andijon" - "Bunyodkor" uchrashuvidagi qizil kartochka ko'rsatilgan vaziyat haqida ketmoqda. Unda qatnashgan Usmonali Ismonaliev, Farhod Bekmurotov o'z fikrlarini bildirdi. Biz o'sha vaziyatdagi yana bir futbolchi Muhammadkarim Toirovga ham yuzlandik.

"Avvalambor, barcha O'zbekiston xalqini kirib kelgan Ramazon oyi bilan muborakbod etaman. Shu bilan bir qatorda, jonkuyar muhlislarimizni yangi mavsum boshlanganligi bilan tabriklayman. “Bunyodkor” jamoasi qarshi o'yinga keladigan bo'lsam, futbolda hamma narsa kuzatilishi mumkin ekan. To'g'risini aytsam faoliyatimda bunday holatga birinchi marotaba tushushim. Ochig'i Usmonali Ismonaliev bilan o'rtamizda bo'lib o'tgan vaziyatda juda arosatda qolib ketdim, sababi maydonda raqib bo'lsak-da, lekin xayotda yaqin akam. Yoshlikdan birga katta bo'lganmiz, bosh hakam qizil kartochka bergandan so'ng, Aziz Asimovga men bilan xazillashganini tushuntirmoqchi bo'ldim. Ammo bosh hakam o'z qarorini chiqarib bo'lgan edi. Ushbu holat men uchun katta saboq bo'ldi va maydonda professionallarga xos tarzda o'zimizi tutushimiz kerakligini tushunib etdim.

Bilasizmi, o'yindan so'ng bo'lib o'tgan ishlarni o'ylab g'alaba ham ko'nglimga sig'madi. Usmonali Ismonalievni yoniga borib uzr so'radim, nima bo'lgan taqdirda ham xayotda, futboldan tashqarisida mening eng yaqin akam hisoblanadi. Shu fursatdan foydalanib aytmoqchimanki, bizni qo'llab quvvatlagan jamoamizning ashaddiy ishqibozlariga o'z tashakkurlarimni aytaman",- deydi Muhamadkarim Toirov Championat.asia muxbiri bilan suhbatda.

Muhammadkarim Toirov: "O'yindan so'ng bo'lib o'tgan ishlarni o'ylab g'alaba ham ko'nglimga sig'madi"