Ачинарлиси ашаддий ишқибозларга эга бўлган клуб яна мухлисларини ҳафсаласини пир қилмоқда. Фанатлик борасида доимо етакчилардан бўлган андижонликларнинг бугунги холатига ҳавас қилиб бўлмайди. Табиийки садоқатли мухлислар жамоадан бу йил бундай натижани сира кутмаганди. Юртимиздаги ишқибозлар орасида энг таниқлиларидан бири бўлган Нодирбек Тўйчиев билан яқинда учрашиб суҳбатлашдик. Халқаро майдонларда ҳам фанатлик борасида ўзини кўрсатишга эришган Тўйчиевнинг ҳам кайфияти тушкун эди. Буни ўзаро суҳбатимиз чоғида билиб олиш қийин эмасди. Ишқибозлар номидан куюниб гапирган мухлиснинг гаплари дангал кўриниш олди.

“АНДИЖОН”НИ ЯНА ОЛИЙ ЛИГАДАН ТУШИБ КЕТАЁТГАНИ БИЗ УЧУН ЯНА ОҒИР ЗАРБА БЎЛМОҚДА

- Тўғриси, жамоамиз бу йил яна олий лигага қайтиб, иштирокини кучлилар сафида давом эттираётганида жуда хурсанд бўлгандик. Биринчи лигага тушиб кетиш жуда аламлидир. Айниқса бу мухлислар учун жуда оғир зарба бўлади. Мавсум бошида яхши ниятлар билан, жамоамизни чемпионатда муносиб иштирок этишига ишонч билан қарагандик. Афсуски бу йилги мавсум биз учун яна омадсиз якун топмоқда. Бундай бўлишига кўп сабаблар бор албатта. Бутун республика бўйлаб, яна шарманда бўляпмиз. Тўғриси, буни ичим ачишганидан гапиряпман. Қайси вилоятга бормайлик, у ердаги мухлислар табиийки “Андижон” ҳақида гап очади ва бу йил ҳам биринчи лигага тушиб кетаётганимизга шаъма қилиб ўтади. Мақтаняпти демангу, мамлакатимизда мухлислик бобида ўз ўрнимизга эгамиз. Жамоамизнинг муваффақияти учун нимаики қилиниши керак бўлса, қиляпмиз. Керак бўлса сафар учрашувларига бориб, далда бўлишни канда қилмаймиз. Биз ишқибозлар учун натижа ижобий бўлиб турса бас. Бошқа ҳеч нарса керак эмас. “Андижон”нинг бугунги ўрнини кўриб туриб, айрим отахон ишқибозларимиз касалликка чалинмоқда. Стадионга мухлисларнинг ташрифи ҳам тан олиш керак кескин пасайиб бормоқда. Тўғри-да, жамоа мағлуб бўлаверса мухлисларнинг ҳам кўнгли совий бошлайди. Ўз вақтида майдонимизга келган рақиблар чўчиган. Бу кетишда дебютантлар ҳам Андижонга чўчимасдан келишни бошлайди. Қачонгача салом биринчи лига, хайр олий лига деб юрамиз! Футбол ишқибозлар учун. Шундай экан бизга курашчан жамоа шакллантирилса, биз ҳам бунга жавобан мухлислик қилишни ортиғи билан бажарамиз. Буни олдинги мавсумларда исботлаб қўйганмиз ҳам!

“МУРАББИЙЛАР АЛМАШИНУВИ ЖОНГА ТЕГИБ КЕТДИ”

- Ҳеч қачон мураббийларнинг тез-тез ўзгариши ижобий холатга олиб келмайди. Ҳар мавсум “Андижон”да мураббий ўзгариши тўғриси, жонимизга тегиб кетди. Мухлисларга натижа ва чиройли ўйин керак. Бошқарув постида кимнинг фаолият юритишининг аҳамияти йўқ. “Андижон”га Азамат Абдураимов бош мураббий сифатида келганида, хурсанд бўлганмиз. Ўз вақтида серқирра ҳужумчилар тоифасидан бўлган Азамат Берадаровични мураббий сифатида ҳам ўзини кўрсатишини, Андижонимизда курашчан жамоа шакллантиришига катта умид боғлагандик. Давралар оралиғида украиналик Сергей Шевченко таклиф этилгач, маҳаллий ишқибозларда олий лигада қолиш учун ўзига хос ишонч пайдо бўлганди. Чунки яхши биламиз, Сергей Яковлевич ўз касбини устаси. Жамоада иш бошлаган илк кунлариданоқ тартиб-интизомни жойига тушириб қўйганди ва аста-секин ижобий томонга ўзгариш қилиб бораётганди. Бироқ унинг клуб ижрочи директори Александр Шапран билан фикрлари бир жойдан чиқмади. Халқимизда “икки қўчқорнинг боши битта қозонда қайнамайди” деган гап бор. Мана шу сўзни бунга нисбатан ишлатса бўлади. Шевченкони “Андижон”да ишлашини афтидан Шапран хоҳламади шекилли, унинг “Про” лицензияси йўқлигини ва бир қатор масалаларни рўкач қилиб, шартнома имзолашни маъқул топмади. Ваҳоланки шундай бўлган тақдирда ҳам хорижлик мураббийни маслаҳатчи ёки менежер сифатида олиб қолиш керак эди. Фойдаси тегиши аниқ эди. Боя айтганимдек, ижобий томонга ўзгариш қилиб бораётганди. Бугунги кунда эса вақтинчалик мураббий Ориф Маматказин ишламоқда. Мавсум сўнггига қадар бу борада ўзгариш бўлмаслиги аниқ. Чунки энди бундан наф чиқиши қийин. “Андижон”да мураббийларни ўзгартириш кўпинча мухлисларга боғлиқ деган гапни эшитиб қоламан. Йўқ, ундай эмас. Ҳар бир одамнинг ўз шахсий фикри бўлгани каби, биз мухлислар раҳбариятга бош мураббийлик учун ўз таклифларимизни билдириб ўтамиз холос. Мисол учун ёзда Сергей Шевченкодан ташқари Усмон Тошев, Юрий Саркисян, Эдгар Гесс, Ислом Аҳмедов, Ҳаким Фузайлов каби мутахассисларнинг номзодлари кўриб чиқилаётганди. Биз кўпроқ украиналик мураббийни келишини истадик. Вилоятимиз раҳбарига катта раҳмат. Шуҳратбек Қўшоқбоевич мухлисларнинг фикрини инобатга олиб, Шевченкони таклиф этди ва у билан музокара ўтказди.

ИЖРОЧИ РАҲБАРНИНГ ФАОЛИЯТИ МУХЛИСЛАРНИ ҲАМ ҚОНИҚТИРМАЯПТИ

- Айтиб ўтганимдек вилоятимиз ҳокими футболни севади ва унинг ривожи учун қўлдан келганича ёрдамини аямайди. У кишининг шахсан ўзи керак бўлса, машғулотларга ҳам келиб, футболчиларни ҳар томонлама қўллаб-қувватлади. Бугунги кунда ҳам “Андижон”нинг такдири билан қизиқади. Бунинг учун Шуҳратбек Қўшоқбоевич Абдураҳмоновга минглаб ишқибозлар номидан катта миннатдорчилик билдириб қоламан. Умид қиламизки, вилоятимиз раҳбарининг эътибори бундан кейин ҳам асло сусаймайди ва Андижонда биз мухлислар хоҳлаган жамоа шаклланишида қўлдан келганича ёрдам беради.

- Шунингдек яна бир жонкуяр раҳбар “GM-Uzbekistan” бошлиғи Улуғбек ака Рўзиқуловдан ҳам миннатдормиз. Жамоамизни имкон қадар моддий жиҳатдан қўллаб-қувватлаб келмоқда. Вилоят ички ишлар бошлиғи Дилшод Раҳматуллаевич Бобожонов ҳам футболнинг чинакам ишқибози. Улар ҳар гал ўйинга ташриф буюриб, бевосита стадионда жамоани қўллаб-қувватлайди. Афсуски шундай раҳбариятга эга бўлган жамоамизнинг ишлари юришмаяпти. Бунга кўпроқ клубнинг ижрочи раҳбарларининг ўз ишига жиддий ёндошмаётгани сабаб бўлмоқда деб ўйлаймиз. Тушунган бўлсангиз, клуб ижрочи директори Александр Шапран ҳақида гапиряпман. Ивановични илгари “Машъал” ва “Бунёдкор”да самарали фаолият олиб борганини жуда яхши эслаймиз. Лекин бу ерда унинг иши ўхшамаяпти. Шапран ўз ишига жиддий ёндошмаётгандек туюлмоқда. Чунки ўзингиз ўйлаб кўринг, ўйиндан 1-2 кун олдин келади. Қолган кунлари Тошкентда бўлади. Жамоанинг ҳар кунги холати билан қизиқиб юрмаган ижрочи раҳбардан нима кутиш мумкин. Орқаваротдан эшитиб қоляпмиз, вақти келса жамоанинг машғулотга чиқиш учун автобусга ёқилғи топиш, ўйинчиларни овқатланиши билан боғлиқ муаммолар юзага келаётганини. Профессионал мақомини олган клубдаги бу каби холатлар табиийки биз ишқибозларнинг дилини хира қилади. Буни кўпчилик мухлислар билмайди. Билмаганлари муаммонинг илдизини бошқа ердан қидиради. Ташкилий ишлар яхши бўлса, натижа ҳам ижобий бўлади деган фикрдаман. Билсангиз кўп мухлислар мақтанчоқ бўлади. Ҳар бир вилоятлик ишқибоз ўз жамоасини ёмонини яшириб, яхшисини ошириб гапиради. Биз ҳам доим “Андижон”ни қаерда бўлмасин, ҳар қандай холатда кўкларга кўтарамиз. Лекин бундай ижрочи раҳбарнинг нотўғри сиёсати эвазига биз мухлислар жабр чекмоқдамиз. Мен футболни жуда яхши кўраман. Кўча-кўйда юрганимда ҳам ишқибозлар мени кўриб қолса, дарҳол “Андижон” ҳақида савол билан “кўмиб” ташлайди. Уларнинг бариси бу йил ҳам олий лигадан тушиб кетамизми яна? Деган савол билан мурожаат қилади. Яқинда бир гап эшитиб қолдим, элитани тарк этиши деярли маълум бўлиб бораётган “Андижон” энди ўйинларда мағлубиятни олдиндан тан олади. Бу борада виждонсиз кишилар шуғулланаётган экан. Ким эканлигини аниқ билмадигу, лекин ўйиндан олдиноқ рақиблар билан келишиб олиш ишлари бошланиб кетибди. Бу кетишда футболимиз қаёққа қараб кетади. Афсуски “Андижон” жамоамиз шундай кунларга қолиб кетди. Кейин яқинда ижрочи директор Шапранни “Олмалиқ” билан ўйиндан бир кун олдин, кечки пайт, меҳмонлар жойлашган “Elita” меҳмонхонасида юрганини ва эшитиб қолдим. Кейин Александр Ивановични ўзи билан гаплашиб, бу ҳақда сўраганимда “Олмалиқ”да ёрдамчи мураббий бўлиб ишлаётган Геннадий Денисовнинг шу куни туғилган куни экан. Шу муносабат билан “Андижон” клубининг ижрочи директори меҳмонхонага ош олиб борган эмиш. Тўғриси, шундан кейин асабийлаша бошладим. Мийямга нималар келганини фақат ўзим биламан. Биз мухлислар ўйин чоғида керак бўлса, қуёшда туриб, бақириб, далда бўлсак-у, ижрочи директоримиз ўйиндан бир кун олдин меҳмонлар билан туғилган кунни нишонлаб юрса... Алам қиларкан тўғриси. У ерда нима ҳақида гап боргани эса менга қоронғу. Лекин реал олиб қарайдиган бўлсак, ҳеч қачон ўйиндан бир кун олдин меҳмонхонага бориб, ким бўлишидан қатъий назар бундай юриши тўғри келмайди. Бу раҳбар яқинда жамоага келиб кетган мураббий Шевченкога ҳам жуда ҳам ҳуник муносабатда бўлган экан. Александр Шапран мана “Андижон”да иккинчи мавсумдирки фаолият юритмоқда. Натижа эса кўриб турганингиздек ноль. Шундай экан мардларча ариза ёзиб, ўз ишини бошқасига берсин. Ҳозирги кунда кўплаб ишқибозлар шуни талаб қилмоқда. Менежерлар ҳақида гап кетганида, дарҳол Самвел Бабаянни эслаймиз. Шахсан менга шу раҳбарнинг иш услуби ва футболга қараши ёқади. Эътибор беринг “Пахтакор” бу йил деярли ўз академиясидан етишиб чиққан футболчилар билан турнир жадвалида пешқадамлик қилмоқда ва чемпионликка жуда яқин. Таркиб анчагина ёшарган. Табиийки Бабаяннинг бундан бир неча йил олдин ишни тўғри йўлга қўя олганини кўрсатади. Кўпчилик у ҳақда баъзида салбий фикрларни билдиради. Лекин жамоа қайд этаётган натижага қаранг. Болалар футболига катта эътибор қилгани боис, бугунги кунда турли ёшдаги терма жамоаларда “Пахтакор”дан номзодлар етарлича бўлмоқда. Бизга ҳам мана шундай ўз касбини севиб, чин юракдан меҳнат қиладиган ижрочи раҳбарлар келишини истардик. Мухлислар бирон-бир раҳбарни “қўйдириб” манфаатдор бўлмайди. Бизга пулболни эмас, футболни яхши кўрадиган раҳбар керак. Эшитиб қоламиз, фалончи раҳбар шунча пул оларкан, шунча мукофот оларкан деган гапларни. Майли қандай катта сумма бўлмасин, олса олаверсин лекин курашчан жамоа шакллантириб қўйиб, ишни тўғри йўлга солиб қўйсин бас. Бошқа ҳеч нарса керак эмас.

“БОЛАЛАР ФУТБОЛИГА БЎЛГАН ЭЪТИБОРНИ ОШИРИШ КЕРАК”

- Вилоятда болалар футболига бўлган эътиборни ошириш кўпинча клубнинг ижрочи раҳбарига ҳам боғлиқдир. Андижон шаҳрининг ўзида бир нечта футбол мактаблари ва футболга ихтисослаштирилган мактаблар бор. У ердан етишиб чиқаётган болакайлар келажакда “Пахтакор” ёки “Бунёдкор”да эмас, балки “Андижон” учун ўйнайман деб ҳаракат қилиши керак. Бунинг учун клуб ўша футбол мактаби билан доимий аълоқада бўлиши ва етарлича шарт-шароит яратиб бериши лозим. Мана кўряпмиз, “Насаф” академияси кучайиб бормоқда. “Машъал”да аввалдан болалар футболига бўлган эътибор юқори ва у ердан бир қатор ёшлар етишиб чиқмоқда. Биз ҳам истардик, Андижонимиздан миллий терма жамоа даражасидаги ўйинчилар етишиб чиқишини. Тўғри, миллий терма жамоамиз сафида бир нечта андижонлик йигитлар ўйнамоқд. Лекин шахсан “Андижон” клубидан таклиф этилаётган ўйинчилар йўқ. Болалар футболи ҳақида гап кетганида биринчи лигадаги “УзДонгЖу” жамоасига ҳам тўхталиб ўтишни истардим. Негаки, бу жамоа ёшлардан ташкил топган бўлишига қарамай, мухлисларни чемпионат давомида қувонтириб келмоқда. Жамоанинг уй ўйинларига кўплаб ишқибозлар ташриф буюриб, роҳатланади ўйинни кўриб. Табиийки бунда бош мураббий Нозимжон Муллаохуновнинг меҳнати ётибди. Қолаверса клуб президенти Зафар Аҳмедович Зулунов ҳам миллионлар ўйинининг чинакам ишқибози. “УзДонгЖу” мавсум бошланиш арафасида йиғилган бўлсад, мана кўриб турганингиздек ҳозир кучли бешликдан жой эгаллаб турибди. У ердан кўплаб ёшлар етишиб чиқмоқда. Келажакда улар вилоятнинг бош жамоаси бўлмиш “Андижон”да ўйнайди ва жамоани юқорига кўтариш учун жуда асқотади. Ҳар холда маҳаллий ўйинчи оз бўлса ҳам ўз вилояти жамоаси учун жон қойитиброқ ўйнайди-да.

МИРАБРОР УСМОНОВ АНДИЖОНЛИК МУХЛИСЛАР БИЛАН ҲАМ УЧРАШАДИЛАР

- Эртага Ўзбекистон футбол федерацияси президенти Мираброр Усмонов Андижонга ташриф буюрадилар. Футболимиз раҳбарининг қилаётган хайрли ишларидан кўз юма олмаймиз. Айнан у кишининг сайи-харакатлари туфайли юртимизда замонавий стадионлар сони ортиб бормоқда. Футболни ривожланиши учун барча шароитларни яратиша уринмоқда. Яқинда Мираброр Зуфаровичнинг Наманганга ташриф буюриб, у ерда махаллий ишқибозлар билан учрашиб, мухлислар билан суҳбатда бўлганини биламиз. Шунингдек “Навбаҳор”га хомий бириктириб берди. Ўйлаб кўрсангиз бу жуда катта иш. Қўшниларимиз учун хурсанд бўлдик. Бу билан наманганлик ишқибозларда клубга бўлган ишонч яна уйғона бошлади. Шуни биз ҳам истардикки, Мираброр Зуфарович Андижонга ташрифи чоғида, маҳаллий ишқибозларни ҳам қабул қилишини ва биз мухлисларни дардини тинглашини. Ўйлаймизки, Усмонов бу таклифимизни инобатга олган холда, ижобий жавоб беради.

“АНДИЖОН”ГА МУНОСИБ МУРАББИЙ КЕЛИШИНИ ИСТАРДИК

- Бунгача “Андижон”да ишлаб кетган мураббийлар орасида шахсан мен Эдгар Гессни алоҳида эътироф этаман. Чунки айнан ушбу мутахассис даврида Андижон халқи футболдан завқланиб яшаган. Унинг ўтказадиган машғулотларига ҳам камида 100-200 нафар ишқибоз келиб бевосита стадионда кузатарди. Эдгар Яковлевич даврида жамоамиз 4-5-ўринларни эгаллаб келган. Афсуски ўшанда ҳам айрим кишилар ўз манфаати йўлида мураббий кетказиш ниятида орқаваротдан турли ҳил салбий ишларни қилган. Шу туфайли Гесс Андижондан кетганди. Ваҳоланки унинг уб ердаги ишлари кўнгилдагидек кечаётганди. Ўйиндан-ўйинга яшардик. Навбатдаги турни интизорлик билан кутганмиз. Бош хомийимиз томонидан ишқибозлар учун сифатли футболка ва шарф берилганди. Биз яна ушбу мураббийни келишини истардик. Тўғри, Эдгар Яковлевич “Бухоро”да натижа кўрсата олмай, истеъфога чиқарилди. Лекин айтишларича у ерда ҳам мураббийга эркин тарзда ишлашга айрим кишилар йўл қўймаган. Футболда таниш-билиш бўлган жойда унум бўлмайди. Хусусан бу йил “Андижон” ёшлар жамоасида ҳам жуда кўп бор таниш-билишчилик қилинганини эшитиб қоляпмиз. Шунинг учун ёшлар жамоамиз ҳам сўнгги ўринда бормоқда. Бундан мақсад нима? Қачонгача бошқа клублардан ижара асосида ўйинчи олиб, уни тарбия қилиб берамиз?! Ёки четдан катта пуллар эвазига ўйинчи олиб келиб ўйнатишни қачон бас қиламиз?! Саволлар жуда кўп. Ҳозир сизга Гессни қайтариш борасида айтган гапимдан сўнг, айрим кишилар нотўғри фикрга бормаслиги учун айтаман, майли бизга Гесс келмасин, лекин ҳақиқий ўз ишини севадиган, вилоятда футболни оёққа тургазадиган мураббий келсин. Бахтиёр Ашурматовга жуда ҳавасим келди. “Навбаҳор”да ҳам биринчи даврада деярли пул бўлмади. Лекин шунга қарамай, шогирдларини бир мақсад йўлида жипслаштира олди. Наманганлик футболчиларнинг ҳар бир учрашувда жон-жаҳди билан курашиши ЎФФ президенти Мираброр Усмоновни ҳам назаридан четда қолмади ва бунинг учун муносиб рағбатлантирилди. Мана эндиликда ҳомий бириктирилгач, жамоада янада ижобий ўзгаришлар бўлса ажаб эмас. Бизга ҳам шундай мураббийлар келишини истардик. Ёки бўлмаса, “Сўғдиёна”ни олиб қарайдиган бўлсак, у ерда ҳам бош мураббий ишни тўғри йўлга қўя олди. Даврон Файзиев ҳам гарчи жамоаси моддий жиҳатдан қийин аҳволга тушиб қолган бўлса ҳам, йигитларни ўйнатмоқда. Эътибор берсангиз, жиззахликларнинг таркибида асосан ёшлар. Шунга қарамай улар олий лигада қолиш учун жиддий курашмоқда.

Жамоамизга келган мураббий 2 йилда чемпион қилиши шарт эмас. Муҳими стадионга келган ишқибоз ўйиндан завқлансин. Уйига яхши кайфиятда қайтсин. “Андижон”ни 1-2 йиллик клуб эмас, балки келажаги порлоқ клуб сифатида шакллантирсин.

50 ЙИЛЛИК ЮБИЛЕЙГА ТЎЁНА БЎЛАДИМИ?

- Мана бу йил “Андижон”нинг 50 йиллик юбилейидир. Қанчалик аламли бўлмасин афсуски жамоамиз яна олий лигани тарк этиш остонасида турибди. Кўпчилик ишқибозлар кейинги йил олий лигада 16та жамоа бўлади, “Андижон” барибир қолади деган фикрларни билдириб, шу тариқа ўзимизни-ўзимиз овутиб юрибмиз. Жамоанинг 50 йиллик тўйида бундай натижа бўлишини умуман кутмагандик. Бироқ айтиб ўтганимдек, клуб ичидаги нотўғри сиёсат туфайли яна биринчи лигага равона бўляпмиз. Тўғри, бу аччиқ лекин ҳақиқат гапларим кимларгадир ёқмаслиги мумкин. Лекин пичоқ суякка қадалди. Энди 50 йиллик юбилей қандай нишонланади? Биз мухлислар учун футболимиз раҳбарлари мана шу тўйга тўёна равишда битта зўр қилиб тадбир уюштириб беришларини хоҳлаймиз. Қозоғистоннинг “Қайрат” клуби юбилей учрашувига жаҳон юлдузлар терма жамоасини таклиф этганини интернетда ўқиб қолдик. Бизга ҳам ҳеч бўлмаганда, Ўзбекистон миллий терма жамоасини Андижонга таклиф этиб, жамоамиз билан ўртоқлик ўйини ўтказиб беришса мухлислар учун ҳақиқий байрам бўларди. Ёки европанинг бирор-бир таниқли клуби биланми, ўйин ташкил этилса хурсанд бўлардик. Ўйлайманки, футболимиз раҳбарининг шахсан ўзи бу ҳақда бизга ёрдам беради.

“АНДИЖОН” – “ЛОКОМОТИВ” ЎЙИН ҲАҚИДА

– Бу ўйин адолатли ўтишига шубҳам йўқ. Сабаби Мираброр Зуфаровичнинг шаҳсан ўзлари ўйинни кўришлари мумкин. Шундай экан футболчиларимиз камида дуранг ўйнашлари керак. Агар уларда биронта шубҳали ҳаракатни кузатсак кейин ўзларига ёмон бўлиши мумкин. Биринчи лигага тушиб кетсак ҳам, бошни тикка тутиб тушайлик.

Исломбек Рустамбеков

Нодирбек Тўйчиев: “50 йиллик юбилейга ўзига хос тўёна қилиб беришларини истардик”