Eronlik o'yinchi raqibning himoyalanmagan oyoq qismining orqasiga butsining "tishlari" bilan zarba berdi. Ushbu vaziyatda raqibga jiddiy jarohat etkazilishi mumkin edi. Qo'pollik o'yin boshida bo'lganiga qaramay, menimcha, hakam yagona to'g'ri qaror qabul qildi va qoidabuzarga qizil kartochka ko'rsatdi.

Eronlik hujumchi kichik "kontakt"ni his qildi va tezda maydonga yotib oldi. Ushbu vaziyatda o'zbekistonlik himoyachining harakatlari raqib futbolchisining yiqilishi uchun sabab bo'lmaydi. Haqiqiy o'yinda bo'ladigan epizod. Hakam bu erda penalti belgilamasdan to'g'ri qaror qabul qildi.

Bu vaziyatda hakam O'zbekiston terma jamoasi darvozasiga penalti belgilab, xatoga yo'l qo'ydi. Darvozabon hech qanday qo'pol xatti-harakatni amalga oshirmadi, hujum qilayotgan o'yinchini kutib olish uchun tashqariga chiqadi. Eronlik o'yinchi kontaktni boshlaydi - uning o'zi oyog'ini darvozabonning oyoqlari orasiga "yopishtirdi", shundan so'ng u yiqiladi. VAR to'g'ri aralashdi va hakamni videotakrorni ko'rib chiqishga taklif qildi. Shundan so'ng bosh hakam penaltini bekor qilib, xatosini tuzatdi. To'g'ri qaror - o'yinni davom ettirish.

Ushbu vaziyatda O'zbekiston terma jamoasi himoyachisi eronlik hujumchiga nisbatdan qo'pollik ishlatdi. Biroq ushbu vaziyatda o'zbek futbolchisining yana biri maydonning markaziy o'qiga yaqinroq va o'z darvozasi chizig'iga yaqin edi. Shu sababli ushbu vaziyatda VAR to'g'ri aralashdi. VARni ko'rgan hakam ushbu holatni ko'rdi va qizilni bekor qildi. Ushbu vaziyatda hakam qizil emas, balki sariq bergani to'g'ri qaror edi.

Uchrashuv hakami mutlaqo to'g'ri qaror qabul qiladi. Ushbu vaziyat biz ko'rib chiqqan 2-vaziyatga o'xshaydi. Eronlik himoyachi raqib futbolchisining yiqilishi uchun hech qanday qo'pollik ishlatmadi. O'zbekistonlik futbolchi esa kichik kantaktni his qildi va tezda maydonga yotib oldi. Menimcha, to'g'ri qaror - o'yinni davom ettirish.

Keling, ushbu epizodning ikki bosqichini xronologik jihatdan ko'rib chiqaylik. Birinchidan, hakam jarima maydonchasiga kiraverishdagi duelni to'g'ri baholadi: o'zbekistonlik futbolchi hech qanday holatda qoida buzmadi, raqib bilan dueldan keyin ham oyoqqa turib, to'pga egalik qilishda davom etmoqda. Keyin u jarima maydonchasiga kirib bordi, u erda eronlik himoyachi unga nisbatan qoidani buzadi, ehtiyotsizlik tufayli qoidabuzarlik qiladi. Himoyachi to'pga o'ynamadi va raqibni yiqitadi. To'g'ri qaror - penalti tepish.

Qizil kartochka, ehtimoliy penalti va chetlatish. "Alyo, ref!" hakamlarning O'zbekiston - Eron uchrashuvidagi qarorlarini tahlil qildi