Jamoa 2014 yilgi mavsumda uch frontda kurashadigan bo'lmoqda. Shu bois Ro'ziqul Berdiev futbolchilarni ertaroq yig'ishga qaror qildi.

- Ro'ziqul aka, jamoangizning dastlabki yig'inni boshlagani haqida eshitdik. Bu haqda o'zingiz batafsil malumot berib o'tsangiz maqsadga muvofiq bo'lar edi?
- 10 dekabr kuni futbolchilarni yig'dik va Tashkentda tibbiy ko'rikdan o'tildi. Kechadan boshlab esa, Qarshidagi bazamizda to'planib, mashg'ulotlarga kirishildi. Bu erdagi yig'inimiz 25 dekabrga qadar davom etadi va shundan so'ng, yangi yil munosabati bilan futbolchilarga qisqa muddatga dam beramiz.

- Tarkibda qanday o'zgarishlar borligi bugungi kunda muxlislarning diqqat etiborida turibdi. Shu bois avvalo bu xususda o'zingizdan eshitsak?
- Hozircha, jiddiy yangilik bor deya olmayman. Ijara asosida “Qizilqum”da to'p tepgan Eldor Boymatov va “Dinamo”dagi Nodir Sanoqulov yana jamoamizga qaytdi.

- Klubni tark etgan futbolchilar ham bo'lsa kerak?
- Yo'q, hech kimga javob bermadik. Bu keyingi yig'inlarimizda oydinlashadi. Lekin aniq nomlarni ayta olmayman.

- Toshkentning “Lokomotiv” jamoasi asosiy raqibi bo'lmish “Bundyokor”dan Nesterov, G'ofurov, To'raev va Hasanovni olib o'z safini sezilarli tarzda kuchaytirishga erishdi. Aytingchi, Siz boshchilik qilayotgan “Nasaf”dan qanday haridlarni kutishimiz mumkin?
- To'g'ri, “Loko”ni yangi haridlarini eshitdim. Bilasizmi, tarkibda u qadar jiddiy o'zgarishlar qilmaymiz. Lekin selekciya jarayonida biz ham qarab turmaymiz. Albatta yangi futbolchilar bo'ladi.

- Kuchaytirilishi lozim bo'lgan chiziqlar deb qaysi poziciyalarni ko'rsatgan bo'lardingiz?
- Bunday poziciyalar yo'q emas. Aynan qaysi chiziqlarga futbolchilar olish kerakligini o'ylab qo'yganmiz. Biroq ayni paytda bu to'g'risida aytmay turganim maqul. Vaqti kelib, barchasi oydinlashadi.

- Zafar Polvonovning “Nasaf”ga o'tish imkoniyatini necha foizga baholaysiz?
- Nima uchun aynan Polvonovni so'rayapsiz?

- Chunki, “Olmaliq” hujumchisining yana “ajdarlar” safiga qaytishi haqida muxlislar orasida gap so'zlar yuribdi?
- Bu ishqibozlar o'rtasida uchrab turadigan xolatlardan biridir. Emishki, Eldor Suyunov, Shoxruh Gadoev, va Artur Gevorkyan ham “Bundyokor”ga o'tarmish... Bu aslida bo'lmagan gap. Ishonch bilan ayta olamanki, bu futbolchilar jamoamizda qoladi. To'g'ri, Polvonov bu yil sermahsullik ko'rsatdi. Lekin unga qiziqib, taklif ham yubormadik.

- “Nasaf” keyingi yil OCHLda ham ishtirok etadigan bo'ldi. Mavsumga qay tarzda tayyorgarlik ko'riladi?
- Ikkinchi yig'inimiz yanvar oyinning dastlabki haftalarida Qarshida start oladi. Bu erda 15 kun shug'ullanamiz. Ushbu yig'inlar davomida poytaxtga borib, sinov-nazorat o'yinlarida ham qatnashamiz. Shuningdek rejamizda Turkiya yig'ini ham o'rin olgan. Xorijdagi yig'inda asosiy etibor o'rtoqlik o'yinlariga qaratiladi.

Islombek Rustambekov suhbatlashdi.

Ro'ziqul Berdiev: “Selekciya jarayonida biz ham qarab turmoqchi emasmiz”