Qashqadaryolik futbolchi “burgutlar” safida o'zini yo'qotib qo'ymadi. Aksincha etakchi o'yinchilardan biri bo'lishga urindi.

- Shahzod, “Andijon”da har xolda o'z o'rningizga ega edingiz. Lekin jamoani tark etishga qaror qildingiz. Nima uchun?

- Birinchi davrada ko'rsatgan o'yinimdan ko'nglim to'lmadi. Qolaversa jamoamning ham ishlari yurishmadi. Shu bois ikkinchi davrada muhitni o'zgartirishga qaror qildim.

- “Andijon” rahbariyati sizni jamoada olib qolish uchun harakat qilmadimi?

- Murabbiylar bilan bu borada gaplashganimizda ular meni qolishimni aytdi. Lekin men bu paytga kelib qaror qabul qilib bo'lgandim. Qashqadaryolik bo'lganim uchun ham yo'l azobi qiynab qo'ydi. Ilgari oilamga yaqin joyda bo'lganim uchun bu menga jiddiy tasir o'tkazdi.

- Etiborlisi siz yana “Mashal”ga qaytdingiz. Bu variant qanday yuzaga keldi?

- Klub rahbariyati bilan suhbatlashdim va jamoaga qaytdim.

- Siz uchun begona bo'lmagan jamoaga kirishib ketshingiz ham qiyin bo'lmagandir?

- Albatta, bu erda futbolchi sifatida tarbiya topdim va o'sdim. Jamoadagi yigitlarning deyarli barchasi bilan yaxshi tanishman. Ular bilan birga oldin o'ynaganman. Bir so'z bilan aytganda meni iliq kutib olishdi.

- Bosh murabbiy bilan munosabatingiz qanday?

- Aleksandr Xomyakov bilan muomalamiz ko'ngildagidek. Boshqa futbolchilar bilan bo'lgani kabi men bilan ham yaxshi munosabatda.

- Bu erda raqobat nisbatan kuchliroq. Yana zaxirada o'tirib qolishdan cho'chimaysizmi?

- “Mashal”ga zaxirada o'tirish uchun kelganim yo'q. Albatta o'ziga yarasha jiddiy raqobat bo'ladi. Asosiysi murabbiyning ishonchi. Raqobat bor joyda o'sish ko'zga tashlanadi. Men bundan qo'rqmayman.

- Yig'in boshlangandir?

- Ha, 3 iyuldan mashg'ulotlarga kirishdik.

Islombek Rustambekov suhbatlashdi.

Shahzod Shaymanov: “Mashal”ga zaxirada o'tirish uchun kelganim yo'q”