Bugungi kundagi axborot almashinuvi, voqealar rivoji, yangiliklar yoki xabarlarning tarqalishi shu qadar tovush tezligida yuz beryaptiki, bittasini o'qib, tahlil va mulohaza qilib ulgurmasingdan keyingisi navbatda turibdi.

Yaqindagina saytimizda jamoamizga yangi bosh murabbiy tayinlash masalasi kun tartibida turganligi va bu borada muayyan ishlar olib borilayotganligi xususida yozgan edik. Nihoyat “Sho'rtan” jamoasi bosh murabbiyligi o'rniga bir nechta taniqli va tajribali nomzodlar orasidan Edgar Gess tanlanganligi haqida xabar berdik. “Oq bo'rilar” jamoasi va uning muxlislari uchun begona bo'lmagan ushbu mutaxassis bilan dastlabki va aytish kerakki, og'zaki kelishuvga erishilgandek bo'lindi, ham. Edgar Yakovlevich jamoaning bir nechta mashg'ulotlarini o'tkazdi. Uning boshqaruvida futbolchilarimiz “So'g'diyona” va “Obod” jamoasiga qarshi sinov-nazorat uchrashuvlarida maydonga ham tushishdi. Tashqaridan qaraganda, guyoki hamma ish o'z joyida ketayotgandek va hamma “Sho'rtan” hamda Edgar Gess o'rtasida bitim tuziladi deb kutib turgan bir pallada reja amalga oshmadi. Klubimiz rahbariyati yaxshi niyatlar bilan ishga taklif qilingan mutaxassis bilan olib borilgan muzokaralarni so'nggi pallada to'xtatishga majbur bo'ldi. Sababi “Sho'rtan” PFKning takliflari E.Gessning qo'ygan “katta” talablariga to'g'ri kelmadi. Bu esa tabiiyki, jamoamiz tomonidan bitimni amalga oshmasligiga olib keldi.

Hayot davom etadi. O'zining rivojlanish yo'nalishi, yuksak maqsad va vazifalariga ega bo'lgan “Sho'rtan” jamoasi birgina mutaxassis xizmatlariga qarab ham, bog'lanib ham qolmagan. Munosib nomzodlarni topish hamda ular bilan muzokaralar olib borish, jamoaning esa milliy chempionatimiz uchrashuvlarida yaxshi ishtirok etib, muxlislarga chiroyli va mazmunli o'yinlar taqdim qilish ishlari davom etadi.

Yangiliklarni saytimiz orqali kuzatib boring.

"Sho'rtan": Klubning takliflari Edgar Gessning qo'ygan “katta” talablariga to'g'ri kelmadi