Ushbu malumotga ko'ra, U-17 Jahon chempionati bundan buyon har ikki yilda bir marta emas, balki har yil o'tkazib kelinadi va 2025-2029 yillar oralig'ida musobaqaga faqat Qatar mezbonlik qiladi.
Xabaringiz bor, shu yilning oktyabr oyida O'zbekiston U-17 terma jamoasi Osiyo chempionati saralash o'yinlarida ishtirok etib, o'z oldiga qo'yilgan vazifani uddaladi va Osiyo chempionati ishtirokchisiga aylandi.
U-17 Osiyo chempionati 2025 yilning 3-20 aprel kunlari Saudiya Arabistonida o'tkaziladi. Bu musobaqaga o'smirlarimizni Islom Ismoilov tayyorlaydi. Musobaqaga hali qura tashlangani yo'q, bizga malum bo'lishicha, dekabr oyida qura tashlanadi. Shunisi aniqki, qura jarayonida O'zbekiston 1-savatchadan joy oladi.
1-savatcha: Saudiya Arabistoni (mezbon), Yaponiya, Janubiy Koreya, O'zbekiston.
2-savatcha: Eron, Yaman, Avstraliya, Tailand.
3-savatcha: Afg'oniston, Tojikiston, Xitoy, Vetnam.
4-savatcha: Indoneziya, Ummon, BAA, KXDR.
Yana FIFAning xabariga qaytamiz. 2025 yildan boshlab U-17 Jahon chempionatida umumiy hisobda 48 ta jamoa qatnashadi. Qatar mezbonligini hisobga olsak, U-17 Osiyo chempionati kichik mundialga boradigan yana 8 jamoani aniqlab beradi.
Bilamizki, avvalgi U-17 Jahon chempionatlarida Osiyodan to'rtta jamoa qatnashib kelardi, endi bo'lsa ishtirokchilar soni oshdi. Qatar - mezbon, shu bilan birga bu jamoa U-17 Osiyo chempionatida qatnashmaydi. Faqat bitta savolga javob topish qolyapti: FIFA qaysi tartibga ko'ra Osiyodan 8 ta jamoani aniqlab oladi?
U-17 Osiyo chempionati reglamentida bu haqda hech narsa deyilmagan. Ehtimol dekabr oyidagi qura marosimida OFK malumot berar. Agar jamoalar 4 tadan to'rt guruhga bo'linishini va har bir guruhdan ikkitadan jamoa keyingi bosqichga chiqishini hisobga olsak, balki keyingi bosqichga chiqadigan 8 jamoa Jahon chempionati yo'llanmasiga ega bo'lar.
X.Xoliqov.
Izohlar