ROSSIYA
28-sentyabr kuni Rossiya Premer-Ligasida 9-tur o'yinlariga start berildi.

Moskvaning Lokomotiv klubi azosi Vitaliy Denisov mazkur turda o'z uyida Amkarga qarshi o'yinda asosiy tarkibda maydonga tushdi. Temiryo'lchilarning 3:1 hisobidagi g'alabasi bilan yakunlangan uchrashuvda Denisov to'liq 90 daqiqa o'ynagan.

Krasnodar klubi o'z maydonida Tulaning Arsenal klubini yirik 3:0 hisobida mag'lub etdi. Krasnodar safida asosiy tarkibda maydonga tushgan Odil Ahmedov to'liq 90 daqiqa o'ynadi.

UFA klubida to'p surayotgan o'zbekistonlik yarim himoyachi Vagiz Galiulin mazkur turda safarda Mordoviyaga qarshi o'yinning asosiy tarkibida maydonga tushib 56 daqiqa harakat qilgan. O'yinda UFA 2:0 hisobida mag'lub bo'ldi.

JANUBIY KOREYA
28 sentyabr kuni Janubiy Koreya K-Ligasida 28-tur bahslari bo'lib o'tdi. Seongnam klubida o'ynayotgan milliy terma jamoasi sardori Server Jeparov ushbu turda safarda Busan klubiga 0:1 hisobida mag'lub bo'ldi. Jeparov o'yinda to'liq 90 daqiqa harakat qildi.

QOZOG'ISTON
Qozog'iston Premer-Ligasida pley-off bahslari davom etmoqda. 28 sentyabr kuni safarda Qayrat klubiga qarshi maydonga tushgan Aktobe klubi 0:2 hisobida imkoniyatni boy berdi. O'zbekiston milliy terma jamoasi azosi Temur Kapadze uchrashuvda 40 daqiqa harakat qildi. Shaxtyor safida to'p surayotgan ikki nafar o'zbekistonlik futbolchilar - Kamoliddin Murzoev va Shavkat Salomovlar mazkur turda maydonga tushirilmadilar.

XITOY
28 sentyabr kuni Xitoy Superligasi 26-turt doirasida Jiangsu - Changchun Yatay klublari o'rtasidagi o'yin bo'lib o'tdi. O'zbekiston milliy terma jamoasi himoyachisi Anzur Ismoilov Changchun safida mazkur uchrashuvda to'liq 90 daqiqa harakat qildi. O'yinda Anzur Ismoilov jamoasi 2:0 hisobida g'alaba qozongan.

BAA
26 sentyabr kuni BAA Pro-Ligasida 3-tur o'yinlariga start berildi. Dubayning Ash Shabob klubida to'p surayotgan O'zbekiston milliy terma jamoasi yarim himoyachisi Aziz Haydarov mazkur turda jamoasi safida o'z uyida Al Nasr klubiga qarshi asosiy tarkibda maydonga tushib 90 daqiqa to'p surdi. Ash Shabob uchrashuvda 2:1 hisobidagi g'alaba qozongan.

Xorijda to'p surayotgan o'zbekistonlik futbolchilarning o'yiniga sharh