Bugun bo'lib o'tgan ertalabki mashg'ulotdan so'ng terma jamoa bosh murabbiyi Xose Mendezning fikrlari bilan qiziqdik.

"Yaponiya terma jamoasi bizdan bir qadam oldinda, juda ham kuchli jamoa. Bizning maqsadimiz shunaqangi kuchli jamoalar bilan o'ynab o'zimizning sifatlarimizni, o'yin uslubimizni yaxshilab borish.

Osiyo chempionatining favoritlari - Eron, Tailand va Yaponiya. Biz shunday jamoalarga qarshi o'ynab o'sib boramiz. Yaponiya bilan o'yindan ko'zlangan maqsad qay darajada turganimizni bilib olish. Pastdami, yuqoridami, o'rtadami?

Bugungi mashg'ulotdan asosiy maqsadimiz pressingdan chiqish, chunki Yaponiya bilan bo'ladigan uchrashuvda taxminimiz bo'yicha yaponlar bizni pressingda ushlab turadi. Lekin terma jamoamiz to'liqligicha shakllanib bo'lgani yo'q, Osiyo chempionatigacha bizda hali vaqt bor.

Yanvar oyida Ozarbayjon yoki Vetnam terma jamoalari bilan muzokaralar olib borilyapti yoki Toshkentda turnir o'tkazilishi mumkin. Biz bilan o'rtoqlik o'yini o'tkazish uchun boshqa terma jamoalardan takliflar bo'lyapti," - deydi Xose Mendez.

Xose Mariya Mendez: "Yaponiya terma jamoasi bizdan bir qadam oldinda"