Кеча Италия чемпионатининг 17-туридан ўрин олган учта беллашув бўлиб ўтганидан хабарингиз бор.

Италия майдонларида бугун яна еттита баҳс ўтказилади.

А Серия, 17-тур. Турнир жадвали

Куннинг дастлабки учрашуви "Сассуоло" ҳамда "Интер" жамоалари ўртасида кечади. "Нерадзуррилар" учун ушбу мавсум кўнгилдагидек ўтмаяпти. Клуб раҳбарияти яқинда Франк де Бурга чиқиш эшикларини кўрсатиб, унинг ўрнига Стефано Пиолини жамоа бош мураббийи этиб тайинлаганди. Шундан сўнг "Интер"нинг ўйинида ўзгаришлар кузатилди. Пиоли қўл остида "Интер" фақатгина "Наполи"га имкониятни бой берди. А Сериянинг қолган беллашувларида Пиоли ҳозирча ёмон натижа қайд этмаяпти.

"Интер"ни бугунги рақиби мезбон жамоа "Сассуоло" саналади. "Яшил-қоралар" А Серияда ушбу мавсумда ўзларининг тўртинчи мавсумларини ўтказишмоқда. 2014 йили Италия чемпионатида дубют қилган "Сассуоло" 17-ўринни эгаллаб А Сериядаги ўз жонини сақлаб қолганди. Илк мавсумда улар ўз олдиларига қўйилган вазифани уддалай олишганди. Кейинги йили эса жамоа анча ўсишга эришди ва бу турнир жадвалидаги ўрнида ҳам акс этди - 12-ўрин. Ўтган мавсумда эса "Сассуоло" ҳақиқий яхши ва жиддий рақибга айланганди. Улар мавсум якунларига кўра, чемпионатда 6-поғонани банд этишганди. Ҳар йили ўсиб келаётган ушбу жамоанинг бу йилги ишлари унчалик юришмаяпти. Жамоа ҳозирги кунда турнир жадвалида 15-ўринда бормоқда.
Бу йили жамоанинг ҳимоя чизиғи жуда суст ўйнаётганига натижасида кўплаб ўйинларда қимматли очколар қўлдан бой берилди.
Шу каби муаммо билан "Интер" ҳам қийналмоқда. Иккита ҳимояси заиф жамоаларнинг тўқнашувида ким ғалаба қозониши қизиқ бўлади.

Ўзаро ўйинлардаги факт:
Бу жамоалар шу кунгача 6 маротаба дуч келишган. Шуларнинг 3тасида "Сассуоло"нинг ва яна учтасида "Интер"нинг қўли баланд келган. Қизиғи, бу жамоалар ўртасидаги ўйинларда ҳали дуранг қайд этилмаган.

"Сассуоло" - "Интер" (16:30) (Сетанта Спорт - Aleziya.com (TAS-IX)
"Стадио Китта дел Триколоре" стадиони.
Бош ҳакам: Марко Ди Белло.

Турнир жадвалида 11 ва 12 ўринни бўлишиб турган "Кьево" ҳамда "Сампдория" жамоалари ўзқро тўқнаш келишмоқда. Бу икки жамоа ҳисобида ҳам бир хил 22 очкодан мавжуд. "Кьево" камроқ гол урган ва қанча гол урган бўлса шунча ўз дарвозасидан ҳам қўйиб юборган. "Сампдория" эса нисбатан кўпроқ гол киритган ва ўтказиб юборган голлари урган голларидан кўпроқни ташкил қилади.
Бу кўпроқ Роландо Маран ва Марко Жиампаоло ўртасидаги қарама-қаршилик десак ҳам бўлади. Бу икки мутахассис учрашувида кимнинг қўли балан келишини кузатамиз.

Ўзаро ўйинлардаги факт:
Ҳозирга қадар ушбу жамоалар жами 22 марта учрашишган. "Кьево" ҳисобида 4та ғалаба, "Сампдория"да эса 10та. Қолган саккизта ўйинда муроса кўчаси танланган.

"Кьево" - "Сампдория" (19:00)
"Стадио М.А. Бентегоди".
Бош ҳакам: Маурицио Мариани.

Бу турда турнир жадвалига ёнма-ён кетаётган жамоалар тўқнашуви давом этади. Етакчилар ўзаро куч синашишаётган бўлса, жадвалнинг қуйи қисмидан ўрин олган жамоалар ўзаро рўбаро келишмоқда. Аутсайдерлар қаторида бораётган "Пескара" ушбу қатордан қочишга интилаётган "Болонья"ни меҳмон қилади.

Ўзаро ўйинлардаги факт:
"Пескара" ҳамда "Болонья" шу кунгача жами 8 маротаба ўйнашган. Бу қарама-қаршиликда ҳозирча тенглик. Ҳар иккала жамоалар ҳам учрашувларнинг иккитасини ўз фойдаларига ҳал этишган бўлса, қолган тўртта баҳсда ғолиб номи аниқланмаган.

"Пескара" - "Болонья" (19:00)
"Стадио Адриатико" стадиони.
Бош ҳакам: Жанлука Рокки.

Неаполда бугун Туриннинг иккинчи рақамли жамоаси "Торино" меҳмон бўлади. Маурисио Сарри шогирдлари ЕЧЛ ўйинлари туфайли А Сериядаги баъзи ўйинларда кутилмаганда очколарни йўқотишгани сабаб пешқадамлар орасидан анча узоқлашиб қолишганди. ЕЧЛдаги вазифа уддаланди. Энди буёғига катта эътиборни яна ички чемпионатга қаратиш мумкин. Кеча "Милан"ни "Аталанта" тўсиғидан қоқилгани "Наполи"нинг "Торино" билан ўйин олдидан иштаҳасини янада ошириб юборгани аниқ. Бугун "Наполи" ғалаба қозонишни уддалай олса, унда неаполликлар турнир жадвалида ўзларига яхши таниш бўлган учинчи поғонага кўтарилиб олишади. Синиша Михайлович жамоаси эса "Наполи" билан орадаги фарқни 3тага қисқартириш учун ҳам меҳмонда ғалаба кўзлашмоқда. Белотти сингари футболчиси бор жамоа "Наполи"ни мағлуб этишга уриниб кўришга қўрқмайди албатта. Гарчи ўйин сафарда ўтказилаётган бўлсада. "Наполи" эса ҳали Аркадиуш Миликнинг хизматидан фойдалана олмайди. Унинг ўрни ҳозирча Мертенс билан тўлдирилмоқда.

Ўзаро ўйинлардаги факт:
Бу тўқнашув катта бой тарихга эга. Ушбу жамоалар барча мусобақаларда жами 126 маротаба дуч келишган. "Наполи" шуларнинг 41тасини ўз фойдасига ҳал этган, "Торино" эса 34 марта устун келган. Қолган 51 баҳсда дуранг қайд этилган.

"Наполи" - "Торино" (19:00) (Сетанта Спорт - Aleziya.com (TAS-IX)
"Сан Паоло" стадиони.
Бош ҳакам: Даниеле Довери.

Ўтган йилги муваффақиятсиз мавсумдан сўнг ҳали ҳам ўзига кела олмаётган "Удинезе" жамоаси бугун дебютант "Кротоне"ни қабул қилади. Луижи Дель Нери жамоаси турнир жадвалида 18-ўринда бораётган "Кротоне"дан 3 очко олишини жамоа мухлислари жуда исташмоқда. Бу ғалаба уларни турнир жадвалининг биринчи қисмига қайтариши мумкин. Давиде Никола бошқарувидаги "Кротоне" эса хавфли зонани тезроқ тарк этиши учун кўпроқ очко жамғариши керак 17-поғонада бораётган жамоа билан ўртадаги 5 очколик фарқни йўққа чиқара олиши лозим.

Ўзаро ўйинлардаги факт:
Бу жамоалар илк маротаба ўзаро дуч келишмоқда.

"Удинезе" - "Кротоне" (19:00)
"Стадио Фрулли" стадиони.
Бош ҳакам: Жеан Лука Саччи.

Турнир жадвалининг энг охирги ўринда бораётган жамоаси "Палермо" бугун жадвалнинг қоқ марказида жойлашган "Женоа"нинг меҳмони бўлади. "Палермо"ни А Серия аутсайдери сифатида таништиришга кўникмаганмиз. Аммо бу йилги мавсум шуни тақозо этмоқда. "Женоа" эса жорий мавсумда анча ёрқин ва яхши ўйинлари билан ажралиб турибди. Уларнинг "Ювентус" устидан эришган ғалабаси фикримизга тасдиқ бўла олади. Бугун эса ушбу жамоа аутсайдерга қарши ўйин ўтказади. Сўзсиз тўқнашув фаворити бу "Женоа" саналади. Иван Юрич қўл остида "Женоа" ўз мухлисларини кўп хушнуд этмоқда.
Иван Юрич ва Дель Нери қарама-қаршилигида ким айёрроқ ва зуккороқ чиқишини эса ўйиндан кейин билиб оламиз.

Ўзаро ўйинлардаги факт:
Бу жамоалар 36 бор тўқнаш келишган. Ўзаро ўйинлардаги устунлик ҳеч бир жамоа қўлида эмас. Яъни тенглик. Ўтказилган 36та ўйиннинг 11тасида "Женоа" ва яна шунчасида "Палермо" ғалаба нашидасини сурган. Қолган 14 ўйин эса дуранг билан якун топган.

"Женоа" - "Палермо" (00:45)
"Стадио Луижи Феррарис" стадиони.
Бош ҳакам: Лука Паиретто.

Турнинг яна бир эътиборга молик ва қизиқарли тўқнашуви шубҳасиз Римда бўлиб ўтади. Унда "Лацио" жамоаси ўз уйида "Фиорентина"ни синовдан ўтказади. "Фиорентина" агарда уч очкони қўлга киритишни уддалай олса, унда "Лацио"га яқинлашиб олади. Аксинча бўладиган бўлса, римликлар ўртадаги фарқни 8тага оширишади. Шунингдек, "Лацио" бу турда "Наполи" ва "Милан"ни ҳам қувиб ўтиб учталикка кириш имкониятига эга. Шу боисдан ҳам "Стадио Олимпико"да ўтадиган ўйинда Симоне Инзаги шогирдларини борларини бериб ҳаракат қилишларига сабаблар етарли. Паоло Соуза жамоаси ҳам етакчилар билан фарқни катталаштириб юбормаслик учун қўлидан келган барча имкониятларини ишга солиши аниқ.

Ўзаро ўйинлардаги факт:
Ўтказилган 136 учрашувнинг 50тасида "Лацио" ғалаба қозонган. "Фиорентина" ҳисобида эса 46та ғалаба мавжуд. Қолган 40та ўйинда дуранг натижаси такрорланган.

"Лацио" - "Фиорентина" (00:45) (Сетанта Спорт + - Aleziya.com (TAS-IX)
"Стадио Олимпико" стадиони.
Бош ҳакам: Массимилиано Иррати.

Сайтимизнинг твиттердаги расмий саҳифаси - twitter.com/championat_asia

А Серия. Превью: "Наполи" ва "Лацио"да 3-ўринга кўтарилиб олиш учун ажойиб имконият