Италияда ҳам бир қатор эътиборга лойиқ трансферлар амалга оширилди. Жамоалар ўзлари учун керакли нуқталарга футболчилар харид қилишди. Хўш, ким қайси футболчини қандай мақсадда олиб келди? Баъзи трансферларни таҳлил қилишга уриниб кўрдик.

Душан Влахович "Ювентус"

Мавсум старти кўрсатдики, "Ювентус"га мунтазам равишда гол урадиган марказий ҳужумчи жуда ҳам зарур. Мората-Кин жуфтлиги 8та гол уришга эришди, "Фиорентина"нинг энди собиқ ҳужумчиси эса 21 ўйинда 17та гол уришни уддалади. Эътибор беринг бундай натижани Душан "фиалкалар" сафида урди. Ўтган мавсум ҳам у 21та гол билан "Фиорентина"га жуда катта ёрдам берганди.

Влахович "Ювентус"га 75 миллион еврога тушди, бир томондан олиб қаралса, ақлбовар қилмас нарх, аммо бошқа томондан "кекса синьора" дунёнинг энг умидли форвардларидан бирини қўлга киритди, устига-устак у А Серияни ҳам яхши билади. Бу вазиятда фақатгина Влаховичнинг бироз чекланган форвард эканлиги ўйлантирмоқда, лекин у эндигина 22 ёш. Массимилиано Аллегри эса футболчиларни ўсишига, кучайишига керакли ишларни қила оладиган мутахассислардан ҳисобланади. Нима бўлганда ҳам трансфердан кўп нарса кутилмоқда.

Денис Закария "Ювентус"

"Боруссия Менхегладбах" футболчиси хизматларига АПЛнинг етакчи клублари қизиқиш билдирганди, у эса А Серияга равона бўлди. У майдон марказида исталган нуқтада ҳаракат қила олади, керак бўлиб қолса, ҳимоя марказида ҳам ёрдам бераверади. Закария жисмонан ўта бақувват, курашувчан ва ўйинни яхши ўқийди. Ягона муаммо 2020 йилнинг март ойидаги жароҳатидан кейин Денис олдинги даражасига чиқа олмаяпти. Унга қадар "Боруссия" уни жуда катта суммага сотиши тахмин қилинганди, ҳозир эса футболчи трансферига бор йўғи 9 миллион тўлашди.

Тезлик бироз пастроқ ва кўпроқ тактикага урғу бериладиган чемпионатда футболчи ўзини яхши томондан кўрсатиши ҳамда фаолиятини аввалги даражага қайтариши мумкин. Футболчининг универсаллигини инобатга олган ҳолда Аллегри уни қайси ролда кўраётгани жуда қизиқ.

Робин Госенс "Интер"

Госенс охирги икки мавсумда ўта сермаҳсул ҳаракат қилмоқда. 22та гол ва 16та голли узатма. Бундай статистикага ярим ҳимоячи ҳам, яхши бир форвард ҳам ҳавас қилса арзийди. Ваҳоланки Робин чап қанот латерали ҳисбланади. У шунчаки Гасперини футболига мос тушди ва энди Индзаги жамоасига кўчиб ўтди. Симоне тактикасида ҳам латераллар муҳим ўрин тутади, фақат мураббий улардан бошқачароқ мақсадда фойдаланади. Индзаги жамоасида латераль алоҳида фигура сифатида эмас, жамоа ҳужумини бошлашда, кўпроқ тўпни олдинга олиб ўтишда фаоллик кўрсатиши зарур.

Агар Госенс бунга мослаша олса, "Интер" чап қанотда жуда кучли кадрга эга бўлади. Бунинг акси бўлса, чап қанотда вақти-вақти билан муаммолар бўлиб туриши мумкин. Шундай бўлсада, бу трансфер ҳали ўз мевасини бериши мумкин, боз устига бундай суммага. Госенс кейинги даражага чиқишга лойиқ эди, "Интер" эса бу вазиятда идеал вариантдек эди.

Артур Кабрал "Фиорентина"

"Фиорентина" президенти Влаховичнинг айнан "Ювентус"га кетганидан жуда норози бўлди. Жамоа бу вазиятда жуда қизиқ ўринбосар топди. Кабрал кўпчиликни қизиқтириб қўйганди. Айниқса мавсумнинг биринчи қисмидаги статистикасидан сўнг. Вариантлар ичида "Зенит" ва "Барселона" бор эди, аммо энди Влаховични йўқлигини билдирмасликка ҳаракат қилади.

Кабрал ҳужумларни якунлашда сербияликчалик бўлмаслиги мумкин, аммо яккакурашларда кучлироқ ва ҳужумни ташкиллаштиришда фойдалироқ. Янги страфкернинг кучли ва кучсиз томонларини инобатга олиб, "Фиорентина"нинг ўйин услуби бироз ўзгаришини кутиш ўринли. Кабрал ҳам ёрқин ўйин кўрсатиб, худди Влахович каби кўп ўтмай топ жамоага йўл олиши мумкин. "Фиорентина" эса футболчи сотишни жуда яхши билади. Кабралдан ташқари жамоа шунингдек Франциядан тезкор вингер Иконени ва Германиядан Кшиштоф Пентекни олиб келди. Шундай экан Флоренцияда ушбу трансфер ойнасидан мамнун бўлишса арзийди.

Стефано Сенси "Сампдория"

Сенсининг маҳорат даражаси қандайлигини Евро-2020дан олдин Италия термасига чақирилгани ва агар жароҳати бўлмаганида, турнирга бориши мумкинлигидан билиб олиш қийин эмас. Шунингдек, у чемпионлик мавсумида асосан даволанганини ҳам инобатга олиш лозим. Ҳа, ҳозир Стефано йиғинга чақирилган, Манчинининг ўзи ярим ҳимоячи ўйнаши кераклигини таъкидлаганди.

Бунинг учун Сенси Генуяга йўл олади ва агар жароҳатлари давом этмаса, у ерда ярим ҳимоя марказининг асосий ўйинчисига айланиши мумкин. Стефано ниҳоят жароҳатларидан буткул соғайди деб умид қиламз. Сабаби, у энг яхши формасида А Сериянинг энг кучли ярим ҳимоячиларидан бири бўла олади. Жамоанинг янги бош мураббийи Марко Жампаоло шундай турдаги футболчиларни яхши кўриши ва Сенсинии "Милан"нинг бўлажак мураббийи сифатида кўришини ҳисобга олсак, унинг "Сампдория"даги ўйинини кузатиш мароқли бўлади.

Жоване Кабрал "Лацио"

Маурицио Сарри жахл отига минган. Мураббий "Лацио"нинг трансфер бозоридаги ишидан норози. Мистер ҳужумкор футболчи кутганди ва Алексей Миранчук, Антонино Барак ва Самуэл Вердени кўз остига олиб қўйганди. Бироқ улардан ҳеч бири Римга олиб келинмади. Шундай бўлсада, "Лацио"га "Спортинг"дан Жоване Кабрал келди. Ўтган мавсумда вингер ўзини яхши томондан кўрсата олди — 5 та гол ва 4 та голли узатма. Бироқ бу мавсум унинг ҳисобида фақатгина биттадан гол ва ассист мавжуд. Жоване тезкор, техникаси юқори, лекин чекланган ва баъзан шошилиш оқибатида, тушунарсиз қарорлар қабул қилади.

Ҳозирча у Сарри жамоасига қандай киришиб кетиши номаълум. Ҳозирча Жоване ҳеч бўлмаса, захирадан майдонга тушиб, "бургутлар"га ёрдам бера оладиган футболчи бўлишини кутиш мумкин. Бироқ "Спортинг"да ҳам асосий таркиб футболчиси бўлмаган ўйинчининг хариди, саволларга сабаб бўлмоқда.

Сержиу Оливейра "Рома"

Рўйхатдаги бошқа футболчилардан фарқли равишда Оливейра "Рома"га январь ойининг бошида келди ва 2 та гол уришга ҳамда номига 2 та ассист ёздириб қўйишга улгурди. "Порту"да футболчи бироз кўпроқ ушланиб қолгандек. Шундай экан Италияга кўчиб ўтиш, Сержиунинг ўзи учун ҳам янги чорлов. "Рома"га ҳимоядан чиқишда ва ўйинни ўқишда бирдек фойдали ҳаракат қила оладиган ўйинчи зарур эди.

Португалиялик ярим ҳимоячи Мхитарян ва Пеллегрини билан тезда тил топишиб улгургандек. Ҳозирча чиндан футболчи янги жамоасига киришиб кетиб улгурди ва фойда келтиришни бошлади. Шунингдек, Оливейра жарима зарбаларини ҳам маромига етказиб амалга ошира олишини таъкидлаб ўтиш лозим. Шу кетишда ёзда сотиб олиш борасидаги пункт фаоллаштирилади чоғи. "Порту" эса футболчисидан умид узиб, унга ўринбосар излайверса ҳам бўладигандек.

Сергей Румянцев

А Серия трансферлари ҳақида