Ушбу турнирда Ўзбекистон номидан иштирок этаётган АГМК ва "Пахтакор" тўрттадан ўйинда майдонга тушди. АГМК 4 очко билан гуруҳ жадвалининг охирги ўрнида боряпти. "Пахтакор" эса 3 очко билан 3-поғонани эгаллаб турибди.

Навбатдаги икки турга кўп нарса боғлиқ. Чунки бунда жамоаларимизнинг кейинги босқичга чиқиш-чиқмаслиги маълум бўлади. "Пахтакор" бугун Эроннинг "Трактор" клуби билан ўйнайди ва охирги турни Ироқнинг "Эйр Форс" жамоасига қарши ўтказади.

АГМК эса эртага "Ал Ҳилол" билан куч синашиб, якуний турда Тожикистоннинг "Истиқлол" клубига қарши баҳс олиб боради. Кўриниб турибдики, ҳар икки жамоа учун гуруҳдан чиқиш осон бўлмайди.

Телеграм каналимизга "Агар "Пахтакор" ва АГМК ОЧЛда гуруҳдан чиқа олмаса, мураббийлар истеъфоси рўй берадими?" мазмунида сўровнома қўйгандик. Бугун сўровнома натижаларини эълон қиламиз. Вариантлар эса қуйидагича эди:

1. Фақат "Пахтакор" мураббийи кетади

2. Фақат АГМК мураббийи кетади

3. Иккала жамоада ҳам мураббий ўзгаради

4. Йўқ, ҳеч қанақа истеъфо бўлмайди

5. Менга фарқи йўқ

Берилган вариантлар орасида энг кўп овоз тўплаган "Йўқ, ҳеч қанақа истеъфо бўлмайди" варианти бўлди. Сўровномада иштирок этган 10 мингдан зиёд мухлиснинг 49 фоизи мана шу вариантда тўхталган. Бу дегани кўпчилик ҳар икки клуб гуруҳда қолиб кетган тақдирда ҳам мураббийлар ўзгармаслигини тахмин қиляпти. Бизнингча ҳам мана шуниси ҳақиқатга яқин бўлса керак.

"Фақат "Пахтакор" мураббийи кетади" варианти 27 фоиз билан иккинчи бўлди. Балки шундай бўлиши ҳам мумкин. Чунки "Пахтакор" ўтган йил ОЧЛда чорак финалга қадар борганди. Мухлислар бу мавсум ҳам камида шундай натижани кутган бўлишса керак. "Пахтакор"нинг йил бошида мураббий борасида бир тўхтамга келиши қийин бўлди. Чунки Шота Арвеладзе кетадими-қоладими, бирданига аниқ бўлмаганди. Қолаверса Арвеладзе кетганидан сўнг клуб раҳбарияти бирданига янги мураббийни тайинламади. Ҳозирда жамоани Питер Хюистра бошқармоқда ва ушбу мутахассисга йил охиригача имконият берилиши ҳам мумкин.

Сўровномада қатнашганларнинг 19 фоизи "Менга фарқи йўқ" вариантида тўхталган. Бу эса айримлар учун бунинг қизиғи йўқлигини билдиради. Тахминимизча, бошқа клубларнинг мухлислари шундай вариантни белгилашган.

"Иккала жамоада ҳам мураббий ўзгаради" варианти 4 фоиз овоз тўплаган бўлса, сўровнома иштирокчиларининг атиги 1 фоизи "Фақат АГМК мураббийи кетади" деган тахминга боришган. Бундан эса жамоа қандай натижа қайд этмасин, Миржалол Қосимов барибир ўз ўрнида қолади деган тўхтамга келиш мумкин.

Агар "Пахтакор" ва АГМК ОЧЛда гуруҳдан чиқа олмаса, мураббийлар истеъфоси рўй берадими? (Сўровнома якунлари)