Ушбу ўйинни эронлик Алиризо Фағони бошчилигидаги ҳакамлар бригадаси бошқариб боради. Биз Ўзбекистон терма жамоалари ва клублари иштирокидаги мана шу ҳакам бошқарган ўйинларни эслашга қарор қилдик.

2010 йил Ўзбекистон ўсмирлар терма жамоаси Тошкентда Осиё чемпионати финал босқичида иштирок этганди. Алексей Евстафеев бошчилигидаги жамоанинг 3та ўйинида Фағони бош ҳакам бўлган. Гуруҳ босқичидан ўрин олган Индонезия (3:0) ва Тожикистон (8:1) ўйинларида вакилларимиз йирик ҳисобларда ютишган. Финалда эса Ўзбекистон КХДР ўсмирларига 0:2 ҳисобида ютқазиб қўйишган. Ўша ўйинда ҳакам Сардор Раҳмонов ва Аббос Махсталиевга қизил карточка кўрсатган эди.

Лондондаги Олимпиада ўйинларига саралаш баҳсларида Ўзбекистон плей-оффда Сурияга қарши ўйнаганди. Вакилларимизнинг 2:1 ҳисобидаги ғалабаси билан тугаган ўйинда Фағони ҳакамлик қилган эди.

2011 йил ЖЧ-2014 саралаши доирасида КХДР - Ўзбекистон учрашувида ҳам айнан эронлик мана шу ҳакам ишлган экан. Ўша ўйинда Александр Гейнрихнинг урган голи Ўзбекистонга сафарда ғалаба келтирган эди - 1:0.

Фағони бошқарган яна бир ўйин 2014 йил ўсмирлар ўртасидаги Осиё чемпионати чорак финалида кузатилган. Александр Мочинов бошчилигидаги ўсмирлар терма жамоамиз Сурияга қарши майдонга тушган ва кучли ёмғир остида ўтган баҳсда 2:5 ҳисобида ютқазиб қўйишганди.

Эронлик ҳакам "Бунёдкор"нинг ОЧЛдаги иккита ўйинини бошқарган. 2013 йил гуруҳ босқичида "қалдирғочлар" Тошкентда "Поханг Стилерс" билан 2:2 ҳисобида дуранг ўйнашганди. 2015 йилнинг февраль ойида Тошкентда "Ал Жазира" билан плей-офф учрашуви ўтказилганди. Ўша ўйин "Бунёдкор"нинг 2:1 ҳисобидаги ғалабаси билан тугаганди.

Ўзбекистон - КХДР
12 ноябрь 2015 йил. Тошкент. "Пахтакор" стадиони. 18:00
Бош ҳакам: Алиризо Фағони (Эрон)
Қанот ҳакамлари: Ризо Сухандон, Муҳаммадризо Мансури (иккиси Эрон)
Захира ҳаками: Мовуд Бонядифард (Эрон).
Назоратчи: Салим Сайид Алсувайди (БАА).
Комиссар: Салмон Муҳаммад Намшан (Саудия Арабистони).

Нарзулла Сайдуллаев

Алиризо Фағони Ўзбекистон учун қанчалик омадли ҳакам?