Шу муносабат билан клуб раҳбарияти 28 декабр куни байрам тадбирини ташкил этди. Мазкур тадбир шаҳардаги ҳашаматли “Андижон” тантаналар саройида ўтказилди.

Унда “Андижон” жамоаси мураббийлар штаби, футболчилар, ишчи ходимлар, “Андижанка” аёллар жамоаси футболчи қизлари, вилоят ҳокимлиги вакиллари, вилоят жисмоний тарбия ва спорт қўмитаси, вилоят футбол федерацияси раҳбарияти иштирок этди.

Шунингдек Андижон вилоятида спортни хусусан футболни ривожлантириш йўлида хизмат қилаётган кишиларнинг айримлари ҳам эътибордан четда қолмади. “Андижон” ишқибозлар клуби фаоллари ва фахрий мухлислар ҳам тадбирга меҳмон сифатида таклиф этилди.

Байрамона руҳда ўтган кечада маҳаллий санаткорлар ўзларининг дилтортар қўшиқлари билан кечага завқ улашган бўлса, раққоса қизлар ўзларининг ўйинлари билан “оғалар” кулгу гуруҳи эса аскиялари билан меҳмонларга юқори кайфият улашди.

“Андижон” футбол клуби раҳбариятининг талқинига кўра, ҳар бир чизиқ бўйича жамоа сафида харакат қилган йилнинг энг яхшилари эълон қилиниб, уларнинг видео роликлари катта экранда намойиш этилди.

Бундан ташқари йил давомида “Андижон” жамоасини оммавий ахборот воситасида кенг тарзда ёритиб борган бир қатор журналистлар клуб вице-президенти Маъруфжон Абдисаломов томонидан ташаккурнома ва эсталик совғалар билан тақдирланди.

Шу тариқа тадбир кўтаринки руҳда якун топди.

“Андижон” футбол клубининг байрам тадбири бўлиб ўтди