Айём олдидан вилоятдаги бир гуруҳ футбол фахрийлари Андижон шаҳридаги кексалар ва ногиронлар учун “Саховат” интернатида бўлиб, ўз вақтида вилоят футболини ривожлантиришга ҳиссасини қўшган Ринат Котелев ва Олег Сазоновларни йўқладилар. Ҳар икки фахрийга ассоциация томонидан тайёрланган совғалар топширилди.

“Баркамол авлод” спорт мажмуасининг мини-футбол майдонида эса фахрий футболчи ва соҳа мутахассислари ўртасида марҳум футбол фидойилари Мироман Ким, Алижон Маражапов, Эргаш Турсуновлар хотирасига бағишланган турнир бўлиб ўтди. Дўстона руҳда ўтган тадбирда иштирок этган уч жамоа вакиллари ҳам вилоят футбол ассоциацияси томонидан эсдалик совғалари билан тақдирландилар.

- Миллий қадриятларимиз акс этган Хотира ва қадрлаш куни олдидан мана шундай тадбирларни ўтказиш анъанага айланган,- дейди вилоят футбол ассоциацияси биринчи вице-президенти Бекзодбек Каримов. – Ўтганларни хотирлаш, кексаларни эъзозлаш халқимизнинг қон-қонига сингиб кетган олийжаноб урф-одатлардан. Сана муносабати билан соҳа ходимлари билан жуда кўп тадбирларни ўтказишни режалаштирганмиз.

Элмурод Эрматов, Андижон

Андижон вилоят футбол ассоциацияси 9 май - Хотира ва қадрлаш кунига бағишланган тадбирлар ўтказди