Пойтахтдаги йиғин чоғида футболчилар кунига икки маҳалдан шуғулланиб, бир қатор синов-назорат ўйинларида ҳам майдонга тушмоқда. Хусусан Қозоғистоннинг "Каспий" ва Бухоронинг "Нурафшон" жамоаси билан бўлган учрашувда нурсиз (0:0) дуранг қайд этилди.

Тошкентнинг "Ўрикзор" клуби эса 3:1 ҳисобида таслим этилди. Кеча "бургутлар" навбатдаги ўртоқлик ўйинини "Хоразм" жамоасига қарши ўтказиб, 2:1 ҳисобида ғалаба қозонди. Учрашувда аввалига урганчликлар стандарт вазиятдан ҳисобни очган бўлса, андижонликлардан Фарруҳ Шотурсунов билан Шаҳбоз Жумабоев рақиб дарвозасини биттадан ишғол қилди ва жамоамиз иродали ғалабани қўлга киритди.

Таркибга марказий ҳимоячи Тимур Кагиров келиб қўшилганини маълум қиламиз. Мухлислар яхши билишса керак, тажрибали футболчи илгари ҳам "Андижон" (2005 ва 2008 йиллар) сафида ўйнаганди.

Эртага жамоамиз "Бунёдкор" ёшларига қарши синов-назорат баҳсида майдонга тушади. Шундан сўнг "Андижон"нинг Тошкентдаги йиғини якунига етади.

"Андижон" матбуот хизмати

Биринчи лига. "Андижон"нинг Тошкентдаги йиғини якунланмоқда