Дмитрий Ан - Таркибдаги 8 нафар боланинг устози. Улар турли ёшларда “Пахтакор” академиясига келганлар. Кимдир 7, кимдир 13 ёшда. У тарбиялаган Файзуллаев, Асқаров, Боймуродов, Пўлатов ва Холдорхонов терма жамоа юраги ҳисобланадилар.

Шерзод Игамбердиев - 2 йил давомида жуда кўплаб сифатли ва кучли рақибларни топиб, ўйинларни ташкил қилди.

Алишер ака ва Барат ака - Бу икки шифокор узоқ вақт терма жамоа аъзоларини яхши формада бўлишларига сабаб бўла олдилар. Жароҳатланганларга ўз вақтида муолажа қилган ҳолда.

“Бунёдкор” стадионининг мутасаддилари - Ва ниҳоят бу аренага юқори технология билан қаралди. Якунда титилиб кетаверадиган майсалар жойида қотди. Бу эса майда пас ўйнаб, алдашни яхши кўрадиган йигитларимиз учун айни муддао бўлди. Стадион чимини идеал ҳолатга келтирган барча-барчага раҳмат.

Хайрулла Бозоров - Фарғона вилояти ҳокими Хайрулла Бозоров битта гуруҳ ўйинини ўз зиммасига олибгина қолмай, “Истиқлол” стадионини идеал ҳолатга келтирди. 4та ечиниш хонасининг бари тартибли. Захира майдони машғулотлар учун яроқли. Стадион энди Суперлига ўйинлари учун ажойиб ҳолатда.

Жаҳонгир Файзуллаев - Мен ҳам ўз пайтида ўзимнинг футболдаги авлодимга эга бўлганман. Бизнинг давр, Гейнрих, Аҳмедов, Турсунов, Исмоилов билан боғлиқ. Жаҳонгир Файзуллаевнинг авлоди мана шу 2001 ва 2003 лар. Мазза қилди бола. Ўз навбатида футболчиларни ҳам инстаграмида қўллаб, улар ҳам унга суратлар учун раҳмат айтиб, байроқлар алмашиб, футболкалар олиб, қисқаси бахтли бўлишди.

Стадиондаги 30 000 нафар, ТВ қаршисидаги 2-3 млн мухлис - Австралияга босимни уюштириб берган биринчи одамлар, булар стадионни тўлдирган мухлислар. Айнан улар пенальтилар сериясида вакилларимизни қўллаш орқали, рақибларимизни хато қилишга мажбур қилдилар. Футболчиларга эса ҳар турда катта маъсулият олдида турганликларини эслатиб турдилар.

Аслида қаҳрамонлар кўп. Қолган футболчиларни тарбиялаб берган мураббийлар, уларни дунёга келтириб тарбия берган ота ва оналар. Буви ва додалар. Ҳудудий ассоциациялар, ҳомийлар, майдонларни ўриб, парвариш қиладиган махсус боғбон ходимлар. Терма жамоанинг оператори, массажчилари ва маъмурлари. Қисқаси, бу ютуқ барчангизники.

Нодирхўжа Юлдашев

Бугунги ЖЧ ортида кўринмаган қаҳрамонлар ҳақида