Қуйида унинг Беларусда сўнгги уч йил давомида ишлагани ҳақида интервьюдан бир парчани тақдим этамиз.

— Сўнгги бир неча йилларда қаерда эдингиз, нима билан шуғулландингиз?
— Сўнгги уч йил давомида Беларусда ишладим: икки йил "Шахтёр-Солигорск" клуби академиясида, ўтган йили эса биринчи лигадаги Петриков шаҳрининг "Шахтёр" фарм клубида. Унда 16дан 18 ёшгача бўлган ёш футболчилар билан ишладим. Олдимизга ёшларни тайёрлашдан бошқа вазифа қўйишмади. Уларни ривожлантиришга ҳаракат қилдик. "Шахтёр-Солигорск"да муаммо бор эди: икки йил олдинги чемпионликни олиб қўйишди ва ўтган йили 30 очкодан маҳрум қилишди. Барча чет элликлар кетишди, шу сабаб ўз ўйинчиларимизни тарбиялашдан бошқа ҳеч нарса қолмади.

— Ўзбекистон футболи ишқибозлари баъзида бошқа чемпионатларни Суперлига билан солиштиришни яхши кўришади, биринчи навбатда МДҲдан. Суперлига қайси жиҳатлар бўйича Беларусь Олий лигасидан кучли-ю, аксинча қайси жиҳатларда кучайиш керак?
— У ерда бошқача футбол, кўпроқ "кучга урғу берилган". Ўзбекистонда барибир кўпроқ техникали футбол, тезлик юқори. Беларусда "вертикал" ўйнашади, кураш кўп.
МДҲдаги барча чемпионатларнинг топ-3 клубларида куч тахминан бир хил деб ҳисоблайман. Пул бор, юқори даражадаги футболчиларни чақира олишади. Икки йил олдин чемпион бўлган пайтида "Шахтёр-Солигорск"да жуда яхши ўйинчилар бор эди. Минскнинг "Динамо"сида ҳам шундай — Беларусь футболининг байроқдори, катта тарихга эга клуб. Фарқ фақатгина ўйин услубида.

Ўзбекистонда сўнгги йиллардаги асосий клуб — "Пахтакор". Агар уни "Шахтёр-Солигорск" билан таққосласак, албатта, "Пахтакор" барибир кучли. Умуман олганда, Ўзбекистон чемпионати Беларусь Олий лигасидан кўра юқорироқ даражада.

— Нега ўзбекистонлик футболчилар Беларусда яхши ўйнаб кетишади?
— Масалан, Ҳусанов ва Абдихолиқов тўғри мураббий, аниқроғи Анатолий Иванович Юревичнинг қўлига тушишган. Яхши мутахассис, мен ҳам айнан унинг олдига бордим: бир ой атрофидаги муддатда жамоа билан бўлдим, машғулотлар жараёнини кузатдим ва жуда қизиқарли бўлди. Юревич бераётган юкламани Ўзбекистондаги ҳамма ҳам кўтара олмайди. Аммо, буларнинг барчаси ўйланган, у кимга қандай юклама беришни тушунади.
Шу сабаб йигитлар кучаяди. Менимча, айнан Ҳусанов билан Беларусга учганман. 16 ёшли йигитча, унга барча юкламани бериш мумкинмаслиги тушунарли ҳолат. Ҳусановни икки йилдан сўнг кўрганимда бу шунчаки "бомба" бўлганди. У шундоқ ҳам яхши эди, шунчаки жисмоний тарафлама қўшганди. 16 ёшидаёқ Абдуқодир Ҳусановнинг узоққа бориши маълум эди.

— Ўзбек футболчиларига Беларусь клубига ўтишни таклиф қилишмоқда дейлик. У ерга йўл олишни тавсия қилармидингиз?
— Олдинроқ айтганимдек, барчаси айнан қаерга боришга боғлиқ. Бир неча мутахассислар борки, уларнинг иши менга қизиқ. Масалан, Юревич бўлса, унда 100% бориш керак. Бу натижа бўлишининг кафолатидир.

— Беларусда нималарни соғиндингиз ва Ўзбекистонга қайтгандан сўнг Беларусдаги нималар етмаяпти?
— Ошхонага келсак, албатта соғиндим. У ерда ўзбек кафелари ва ресторанлари бор, асосан ўша ердан овқатландик. Ош, нон – булар етарли даражада мазали эди, аммо Ўзбекистонда янада мазалироқ. Бу ерда нимани соғинаётганимга келсак – бу Беларусь табиати. У ерда экология аъло даражада, менимча шу сабаб ҳам у ерда ўйинчилар қўшишади. Бу ерда эса катта юкламаларни кўтариш қийин.

Сергей Лучшан билан интервьюнинг тўлиқ версияси тез орада YouTube'даги каналимизда чиқади. Бу интервьюдан қуйидагиларни билиб оласиз:
• Нега Достон Ҳамдамов чет эл чемпионатларида ўйнаб кета олмайди;
• "Бунёдкор"нинг муваффақиятсизликларида фақатгина Иван Бубало айбдорми;
• Лучшанга Суперлигадаги қайси мураббийнинг иши кўпроқ ёқади;
• ёшлар билан ишлаш осонроқми ёки тажрибали футболчилар билан.

"Бунёдкор" собиқ бош мураббийи Сегей Лушчан: "16 ёшидаёқ Абдуқодир Ҳусановнинг узоққа бориши маълум эди"