Ўтган турдаги "Пахтакор"дан учралган мағлубиятдан сўнг руҳий томонлама тиклана олган "қалдирғочлар" дербида "темирйўлчилар"дан устун келди. Баҳсдан сўнг тур безагига айланган голлардан бирини урган "Бунёдкор"нинг туркманистонлик легионери Селим Нурмурадовнинг фикрлари билан қизиқдик.

"Мен бу онларни тезроқ келишини кутгандим. Гол урганимдан кейин ўзимга бўлган ишонч ортишини билардим. "Локомотив" дарвозасига тўп киритдим ва жамоамга фойда келтирдим. Биринчи гол доим ёқимли бўлади. "Пахтакор" билан ўйиндан кейин олдимизда фақат битта вазифа қолганди. У ҳам бўлса ғалаба қозониш ва мухлислар олдида айбимизни ювиш. Эндиликда қолган учрашувларда максимал очко жамғаришимиз лозим.

Ҳа, мавсум бошида жароҳат олиб сафдан чиққандим. Карантин даврида тикланишга катта эътибор бердим. Тезроқ тузалишни ва яшил майдонга қайтишни чин дилдан хоҳладим. Бу дамларни ўтказиш жуда қийин бўлди. Вадим Карленовичга билдираётган ишончи учун катта раҳмат айтиб қоламан. Унинг ишончини сўндирмаслик учун бор кучимни ишга соламан",- дейди Селим Нурмурадов.

"Бунёдкор"нинг туркманистонлик легионери "Локомотив" билан ўйиндан кейин нималар деди?