Аммо раҳбарият томонидан етарли эътибор берилмаётгани натижасида Файзиевга ҳам осон бўлмаяпти. Гарчи олдида бир нечта таклифлар турган бўлишига қарамай, “Сўғдиёна”да қолиб, холатни ижобий томонга ўзгаришидан умидвор бўлаётган мураббий билан сўнгги бор олий лигада жамоалар сони 16та бўлиши эълон қилингач суҳбатлашгандик. Шунда Даврон Ориповичнинг хурсандчилиги чексиз эди. Янги мавсумга янги умидлар билан тайёргарлик кўришни режалаштираётганини яшириб ўтирмаганди ва имкониятдан муносиб равишда фойдаланиб қолишлари кераклигини жуда яхши хис этаётгани таъкидлаганди.

Бугун Файзиев билан яна боғландик. Ўзаро салом-аликдан кейин, клубга оид саволлар билан мурожаат қилдим. Шунда мураббийнинг тушкун кайфиятда эканлигини билиш қийин эмасди. Клубдаги вазият ҳақида ҳозир гапиришга ожиз эканлигини билдириб. “Касалини яширсанг, иситмаси ошкор этар” деган иборани ҳам қўшимча қилди. Мураббийнинг айтишича, жамоа ҳануз футболчилар билан тўлиқ ҳисоб-китоб қилмаган.

Бундан ташқари “Сўғдиёна”нинг декабрь ойида йиғин ўтказмаслиги маълум бўлди. 3 январдан футболчиларни йиғиш режалаштирилмоқда. Табиийки бундан хабар топган ҳар қандай футболчи Жиззах жамоасига боришга иккиланиб қолиши турган гап. Чунки кимни ҳам моддий қийинчиликка дуч келган жамоага бориб ўйнагиси келади. Албатта бундай вазиятда мураббийга қийин кечади. Чунки у ўз жамоасида кўришни истаган футболчиларни таклиф этишда ҳижолат чекиши аниқ.

Даврон Файзиев агарда клубда вазият ўзгармаса дўстона руҳда ҳайрлашиши ҳам мумкин. Буни мураббийнинг ўзи ҳам инкор этмади.

Исломбек Рустамбеков.

Даврон Файзиев: “Клубдаги вазият ҳақида гапиришга ожизман”