Қатар Юлдузлар Лигаси

Санжар Шоаҳмедов ва Сардор Рашидов Доҳадан жўнаб кетгач, Қатарда ўзбекистонлик икки футболчи қолди: Санжар Турсунов ва Темурхўжа Абдухолиқов. Шанба оқшоми улар тўп сурадиган жамоаларга омадли келмади. Ҳар икки футболчимиз мағлубият билан юзлашди.

Темурхўжа билан суҳбатлашдик. Айтишича, раҳбарият жамоа олдига минимум 4-ўринни қўлга киритишни вазифа қилиб белгилаган. Боиси, бу Чемпионлар Лигасига йўлланма бериши мумкин бўлган поғона.

Айни пайтда “Ас-Сайлия” 4-ўринни эгаллаб турибди. Кучли учликка кириш имконияти жуда кам. Бироқ мана шу 4-ўринни сақлаб қолишнинг имкони бўлармикин? Ахир Абдухолиқов жамоадошлари охирги ўйинда 0:6 ҳисобида имкониятни бой берди.

“Мезбонлар 2 та гол ургач, жамоамиз ўйинни ташлаб юборди. Иккинчи бўлимда ҳаммаси чалкашиб кетди — дейди Абдухолиқов. — Шунақаси ҳам бўлиб туради. Бу мағлубиятни эсдан чиқариб, кейинги ўйинларни ютишимиз керак. Чунки “Ас-Садд”га қарши ҳамма ёмон ўйнади: дарвозабондан тортиб, ҳужумчиларгача”.

Хави тўп сурадиган жамоага қарши ўйинда Абдухолиқовда гол уриш учун имконият ҳам бўлмаган. Ўйиндан кейин футболчиларнинг кайфияти жуда тушкун бўлгани учун, ортиқча гап ҳам гапирилмаган. Бугун — душанба куни даҳшатли мағлубият сабаблари таҳлил қилиб чиқилади.

“Жамоа ютқазиб қўйса, биринчи айб легионерлардан изланади. Шунинг учун ҳам бу ерда ҳамма ўйинда максимал югуришга ҳаракат қиламиз”, — деди Абдухолиқов. “Ас-Садд”га қарши ўйинда Темурхўжадан ташқари жазоирлик Нодир Белҳож, бразилиялик Вагнер Рибейро, руминиялик Валентин Лазар тўп сурганди. Аммо бунинг ҳеч қандай фойдаси бўлмади.

Абдухолиқов айни пайтда тўпурарлар орасида 7-ўринни эгаллаб турибди. Дастлабки 10 таликда асли Қатардан бўлган бирорта ҳам футболчи йўқлиги эътиборга молик.

Санжар Турсунов тўп сурадиган “Ал-Ҳаритият” клубининг нафас олиши унчалик яхши эмас. Лига аутсайдерларидан бирига айланиб қолган жамоа 13-турда қандайдир каромат кўрсатиши қийин эди. Хави жамоаси билан рақобатлашаётган “Ар-Райян” кутилганидек Турсунов жамоасига имконият қолдирмади.

“Ал-Харитият” бош мураббийи Санжар Турсуновни бошланғич таркибга киритмади. Унинг жамоаси биринчи бўлимнинг ўзидаёқ 3 та гол ўтказиб юборгач, мураббий ечиниш хонасига кириб кетаётганидаёқ Турсуновга машғулотни бошлашни буюрди.

Шу тариқа ўзбекистонлик легионер иккинчи бўлим бошидаёқ майдонда пайдо бўлди ва меҳмонлар ўйини жонланди. Улар ҳатто дурангга яқин ҳам келаётганди. Бироқ ҳужумга ўтиб кетган жамоа ҳакам томонидан қўшиб берилган дақиқаларда жазоланди.

“Иккинчи бўлимда ўйиннинг боришини ўз томонимизга ўзгартира олдик. Бироқ якунда барибир тўртинчи голни ўтказиб юбордик. “Ар-Райян” ҳақида биласиз, соврин учун кураш олиб бораётган жамоа. Бизда 4 нафар легионер бўлса, уларда 9 та. Шулардан 5 нафари лимитни бузиб қўймаслик учун Қатар фуқаролигини олган”, — деди Санжар Турсунов.

Турнир жадвалида “Ас-Сайлия” раҳбарият талаб қилаётган ўринни эгаллаб турибди. Санжар Турсунов жамоаси эса хавфли зонада. Регламентга кўра, 12-ўрин эгаси Юлдузлар Лигаси билан хайрлашади. 11-ўрин соҳиби эса плей-оффда ўйнайди. “Ал-Ҳарайтият” ҳозир шундай мавқеда.

Championat.asia статистикаси

ЛегионерУз. Қатарда нурсиз шанба. Абдухолиқов жамоасига 6 та гол уришди, Турсуновникига 4 та