Йиғилишнинг асосий мавзуси, жамоадаги муаммоларни ўрганиш, яқинда Қатарда бўлиб ўтган мағлубият сабабларини кўриб чиқиш, камчиликларни бартараф этишга бағишланди.

Раҳбарият ва мутасаддилар, “Ал-Садд” жамоасига қарши ўйиндаги йирик мағлубият (2:6 ҳисобида) нафақат “Локомотив”, балки ўзбек футболи шаънига туширилган доғ эканини таъкидлаб, бу шармандаликка нима сабаб бўлгани билан қизиқишди.

Мураббийлардан Андрей Микляеев сўзга чиқиб, бу каби уятли ҳисоб ва палапартиш ўйинни ҳеч қандай баҳона билан оқлаб бўлмаслигини айтиб, жамоага яна бир имконият беришни илтимос қилди. “Бир ой давомида, клубимизда тартиб ўрнатиб, ғалабалар билан ҳам мухлисларни, ҳам раҳбарият ишончини оқлашга ҳаракат қиламиз, акс ҳолда бизга бу ерда ўрин йўқ”, - дейди мураббий.

Раҳбарият футболчиларга юзланар экан, “нима учун жамоада бунчалик бепарволик мавжуд, ватан олдидаги бурч, ватанга, юртга нисбатан ҳурмат, ғурур деган тушунчалар борми”, дея мурожаат қилди. “Агар бўлса, нима сабабда шу ғурур ва шаън учун курашиш суст”, - деган саволга жамоа сардори Тимур Кападзе жавоб берди.

“Биз учун яратилган шароит ва имкониятлардан келиб чиқиб, ёмон футбол кўрсатишимиз кечирилмас бир ишдир. Футболда мағлубиятлар бўлиб туради, бироқ ҳамма ҳам бундан тўғри ўз хулоса чиқара олмайди. Йигитларда психологик босим бўлган бўлиши мумкин, бироқ барчамиз ғалабага шайланиб майдонга тушгандик. Сўз берамизки, бундан кейин бу каби шармандалик юз бермайди”, - дейди Кападзе.

Жамоа раҳбарияти ва мутассаддилари берилган баёнот ва айтилган сўзлардан келиб, чиқиб шуни хулоса қилишдики, футболчилар ва клубга вазиятни ўнглаш учун бир ой муддат берилади. Шу муддат ичида жамоа ичидаги аҳиллик, мураббийлар тактикасида ижобий ўзгаришлар кўзга ташланмаса, раҳбарият кескин чоралар кўриши айтилди.

“Локомотив”: Футболчилар раҳбариятга сўз беришди