Ўйиндан кейинги матбуот анжуманида иштирок этган олмалиқликлар бош мураббийи Миржалол Қосимовнинг фикрлари қуйидагича бўлди:

- Қийин ғалабага эришдик. Ўйин томонлама эмас, майдон ҳолатидан кўпроқ қийналдик. Биринчидан, сунъий майдон. Иккинчидан, худди бетонга ўхшаб жуда қаттиқ экан. Шахсий фикрим, бу каби майдонларда ишдан кейин кечки пайт ҳаваскорлар келиб, шунчаки дам олиш учун тўп тепиб турса бўлади. Лекин профессионал футболчиларни бундай майдонларда ўйнатиш керак эмас. Айниқса, Суперлига ва Пролига жамоалари ўйнайдиган стадионлар яхши ҳолатда бўлиши керак.

- "Хоразм" ҳақида фикрингиз?

- "Хоразм" уй учрашувларини шу стадионда ўтказгани боис ўз майдонини жуда яхши билади. Улар бежизга "Андижон"ни мағлуб этгани йўқ. Ютганимиздан хурсандман. Муҳими, ўйинни жароҳатларсиз тугатиб олдик. Энди "Зомин" билан бўладиган беллашувга тайёргарлик кўрамиз. "Хоразм" клубига омад тилайман.

- АГМК Суперлига турнир жадвалида юқори ўринларда бормаяпти. Бу нима билан боғлиқ деб ўйлайсиз?

- Мавсумнинг биринчи ўйинида нималар бўлганини ҳамма кўрди. Иккита қизил карточка ва бошқа сабаблар туфайли ютқазиб қўйдик. Ҳозир эса секин-аста ўзимизни ўнглашга ҳаракат қиляпмиз ва тез орада кучлилар сафига қайтамиз деб умид қиламан. Ҳар бир ўйиндан тўғри хулоса чиқарган ҳолда кейинги учрашувга ҳозирлик кўряпмиз.

Миржалол Қосимов: "Хоразм" майдони кўпроқ ҳаваскорлар келиб ўйнаса бўладиган майдонга ўхшаркан"