Шаржа шаҳридаги "Шаржа Стэдиум"да Сурия ва Фаластин терма жамоалари ўзаро баҳс олиб боради. Ўйиндан олдин ташкил қилинган матбуот анжуманида ҳар икки жамоа бош мураббийлари иштирок этишди.

"Машғулотларга ўзгача кайфиятда ёндошдик, мусобақага аъло даражада тайёргарлик кўрдик. Сурияга қарши ўйинимиз билан нафақат Осиё, балки жаҳон эътиборини ўзимизга қаратишни хоҳлаймиз", - дейди Фаластин бош мураббийи Нуриддин Оулд Али.

Ҳозирда бу жамоани жазоирлик мураббий бошқармоқда. 46 ёшли мураббийнинг айтишича, гуруҳ фаворитлари Австралия билан Сурия. "Ҳа, биз дастлабки учрашувни фаворитлардан бирига қарши ўтказамиз. Лекин бундан саросимага тушаётганимиз йўқ. Мусобақага тайёргарликни Қатарда олиб бордик ва ҳаммаси яхши кечди. Сурия термасида кучли футболчилар кўп, бироқ биз ҳам қараб турмаймиз ва жамоа сифатида натижа кўрсатишга ҳаракат қиламиз".

Сурия терма жамоаси бош мураббийи Бернд Штангенинг фикрлари қуйидагича бўлди:

"Биз жуда яхши тайёргарлик кўрдик. Сафимизда битта жароҳат олган футболчи бор: Фирас Ал Хатиб. Қолган ўйинчилар соппа-соғ ва ўйинга тайёр. Жамоамиздан ҳали ҳеч ким биз бу ерга чемпион бўлиш учун келдик дегани йўқ. Чунки мусобақада яхши жамоалар кўп ва ҳамма билан ўйин оғир кечади. Қолаверса, бу мусобақада жаҳон чемпионатида қатнашган жамоалар бор. Кўпроқ шулардан эҳтиёт бўлиш керак".

"2007 йилги Осиё Кубогида Ироқ терма жамоаси чемпионликни қўлга киритиб, футболда ҳамма нарсанинг иложи борлигини кўрсатиб берганди. Балки бу мусобақа Сурияга аталган бўлиши мумкин. Футболда олдиндан катта гапирмаслик керак, лекин мақсад сари секин-аста ҳаракат қилиш лозим деб ўйлайман".

Осиё Кубоги. Сурия - Фаластин. Ўйиндан олдинги матбуот анжумани