Умумий қилиб айтганда катта футбол қайтмоқда. "Сурхон" - "Олимпик", "Пахтакор" - "Динамо", "Сўғдиёна" - "Бунёдкор" учрашувлари билан 14-тур баҳсларига старт берилади. Мазкур ўйинлардан олдин мутахассис сифатида Бахтиёр Ашурматовнинг фикрлари билан қизиқдик.

- Иккинчи давра олдидан кўп жамоалар таркибларини сезиларли даражада кучайтиришди. Бу омил учрашувларнинг янада қизиқарли ўтишини таъминлайди. Кўряпсиз учрашувлардан олдин тахмин қилиш жуда қийин бўляпти. Аввалги йиллардан фарқли равишда чемпионлик учун 6та жамоа курашмоқда. Турнир жадвалининг қуйидаги жамоалар ўртасидаги очколарда ҳам катта фарқ йўқ. Интрига охирги турга қадар сақланиб қолади, деган фикрдаман.

- "Сурхон" жанговор футбол кўрсатишига қарамасдан "Олимпик"нинг имкониятларини юқори баҳолайман. Тимур Кападзе бошчилигидаги жамоа ажойиб ва қизиқарли футбол кўрсатмоқда. Бу ўйинда меҳмонларнинг ғалабасини тахмин қиламан.

- Ушбу учрашув қизқарли ўтади, деб ўйлайман. Максим Шацкихнинг мураббий сифатида биринчи ўйинини мухлислар интизорлик билан кутишмоқда. Уларда "Динамо"га нисбатан таркиб кучли. Шу боис "Пахтакор" 2та тўп фарқи билан уч очкога эга чиқиши мумкин. Шацких қураётган "Пахтакор" қандай бўлиши ҳаммага қизиқ. Унинг мураббийликдаги салоҳияти қандай эканлигини ҳали ҳеч ким билмайди. Ишлаш услуби менга ҳам қизиқ. Максим мураббий сифатида чемпионатимизга қандайдир янгилик олиб киради. Фаолияти давомида кўплаб кучли мураббийлар билан ишлаган. Жамоада яхши таркиб, инфратузилма яхши шаклланган. Шацкихда ўзини кўрсатиши учун яхши имконият мавжуд. Бу йўлда омад тилайман.

- Бу баҳсда "Сўғдиёна" ютуқни тантана қилади, дея оламан. Чунки Улуғбек Бақоев жуда жанговор жамоа тузган. Тўғри унинг йўлга қўйган ўйинини танқид қилаётганлар ҳам бор. Бироқ аутсайдерлар қаторидан совринли ўринлар учун курашадиган жамоа туза олди. Бу ерда мураббийнинг катта меҳнати бор. Натижаларидан келажаги порлоқ эканлигини сезиш қийин эмас.

- Водий дербиси доим муросасиз кечган. "Қўқон -1912" таркибини сақлаб қолди. "Нефтчи"да ўзгаришлар талайгина. Янги мураббийга жамоага мослашишим, қарашларини сингдириш учун вақт керак. Менимча, кичик устунлик қўқонликлар томонида.

- "Насаф" - "Навбаҳор" шубҳасиз турнинг марказий баҳси ҳисобланади. Чемпионлик учун асосий давогарлар ўртасидаги ўйин. Нима бўлганда ҳам мухлислар зерикиб қолмайди. Тахмин дуранг натижа қайд этилса керак.

- Бу беллашувда АГМК фаворит. Олмалиқ шаҳри жамоаси нисбатан кучлироқ.

- "Қизилқум" ҳар йилгига қараганда яхшироқ натижа кўрсатмоқда. Мазкур тўқнашувда томонлар муроса кўчасини танлаши эҳтимоли катта.

- Чемпионлик учун курашда "Насаф" ва "Навбаҳор" жамоалари қаторига "Пахтакор" ва "Сўғдиёна"ни қўшган бўлардим. Ҳеч қайси жамоа мухлисларини ҳафа қилмаган ҳолда, Самвел Бабаян шогирдлари чемпионликни нишонлайди, деб ўйлайман. Клуб раҳбарияти бунинг учун барча шароитларни яратиб беряпти. Жамоанинг ашаддий ва бетакрор мухлисларининг ҳам умиди катта.

Абдулазиз Искандаров тайёрлади

Шацких қураётган "Пахтакор" қандай бўлади? Чемпионлик учун кураш "Навбаҳор" ёки "Насаф"? ёхуд 14-тур олдидан мутахассис фикри