"Бугун иккита ҳар хил бўлимларга гувоҳ бўлдик. Биринчи бўлимда "Машъал" тўлиқ устунлик қилди, ҳатто улар 3-4 та тўп киритишлари ҳам мумкин эди. Иккинчи бўлимда эса аксинча, биз устунлик қилдик. Йигитларга танаффусда берган кўрсатмаларимизга амал қилиб ўйинни бизнинг фойдамизга ҳал қилганликлари учун мураббийлар штаби номидан миннатдорчилик билдираман.

- "Металлург" таркибида бир нечта ёш ўйинчилар ҳаракат қилаётганига қарамай жамоа натижа кўрсатмоқда. Ёшлар мавсум давомида стабилликни сақлаб қола оладими?
- Бир неча йиллардан буён таркибимизда катта ўзгаришлар қилмадик, бу йил эса кўплаб футболчилар жамоани тарк этишди. Уларнинг ўрнини асосан ўринбосарлар таркибимиздаги ёш ўйинчилар, шунингдек бошқа жамоалардан таклиф этилган айрим футболчилар тўлдиришди. Жамоамизнинг асосий мақсади ёшлар билан ўтган йилгидан яхшироқ натижа қайд этиш.

- Олий лига 2 ва 3 турлари орасида анча вақт бор. Жамоа бу вазиятдан қандай чиқиб кетади?
- Клубимиз одатдагидек беш кунлик режим асосида машғулотларни олиб боради. Бу орада Ўзбекистон кубогининг 1/16 финали доирасида ўйинимиз бор, кубокдаги мақсадимиз 1/8 финалга чиқиш. Ушбу учрашувдан кейин эса Чирчиқда машғулотларни давом эттирамиз.

- Киритилган голлар ҳақида қандай фикрдасиз?
- Мен биринчи голимизга тўхталмоқчиман. Ўйиндаги ҳисобни тенглаштирувчи голни киритган вазиятимизда "Бунёдкор"дан таклиф этилган Жавоҳир Эсонқулов охиригача курашди. Бу йигит 1997 йилда таваллуд топган, агар мана шу темпда ўйнашда давом этса келажакда терма жамоада ҳам кўришимиз мумкин.

"Машъал" матбуот хизмати

Шавкат Саидов: "Металлург"нинг мақсади ёшлар билан яхши натижа қайд этиш"