Мазкур иншоотда иайни пайтда Ўзбекистон, Япония, Жанубий Корея ва Иордания терма жамоалари аъзолари истиқомат қилишяпти. Саудия Арабистони бугун ортга қайтиши лозим эди.

Япония ОАВда фаолият олиб бораётган Шуижи Такамура билан қисқача суҳбатда бўлдик.

"Агар терма жамоангиз бугунги ўйинини 1/4 финалда ҳам кўрсата олса, бу сизларни учрашув фаворитига айлантиради. Агарда ҳаракатингиз Хитойга қарши ўйиндек бўлса, сизлар аутсайдер вазифасини ўтайсизлар. Ўзбекистон терма жамоаси учта ўйинда уч хил кўринди. Бир хиллик йўқ. Бу ҳам яхши, ҳам ёмон. Боиси мухлисларингиз бугун қандай ўйнашингизни билишмайди.

Сўнгги турда очиғи мен терма жамоангиздан бундай ўйин кутмагандим. Шунчаки ҳаммаси ажойиб. 4-рақамдаги футболчи менда илиқ таассурот қолдирди. Аҳмедов ва Денисов ҳам ўз репертуарида. Бундай қийин вазиятдан ҳамма ҳам чиқиб кета олмайди. Мен ҳакамнинг қарорини назарда тутяпман" - дейди Такамура.

Бевосита терма жамоаси ҳақида эса у қуйидагиларни гапириб ўтди:

"Кагава ҳали ўзини кўрсата олгани йўқ. Ўзи терма жамоамиз гуруҳ ўйинларида ҳеч қачон бор маҳоратини ишга солмаган, 1/4 финалдан бошлаб тезликни оширамиз. 2011 йилги Осиё Кубогини ёдга олсак кифоя. Лекин Осиёда футбол тезлик билан ўсаётганини ҳам унутмаслигимиз керак. Япония ҳозир аввалги йиллардагидек осонлик билан ютаётгани йўқ".

Нодирхўжа Юлдашев.

Шуижи Такамура: "Ўзбекистон чорак финалнинг ҳам фаворити, ҳам аутсайдери"