Айни кунларда вилоятимизда ушбу спорт байрамига катта тайёргарлик кўрилмоқда.

Универсиада баҳслари сирасига кирувчи 15 та спорт тури бўйича ғолиблар аниқланади.

Спорт ўйинларининг футбол мусобақасида бош соврин учун тўртта терма жамоа кураш олиб боради. Булар саралаш босқичида муваффақиятли иштирок этган – Фарғона вилоят терма жамоаси, Самарқанд вилояти терма жамоаси, Қорақалпоғистон Республикаси терма жамоаси ва Тошкент шаҳри терма жамоаси.

Ушбу тўртта терма жамоа олимпия тизимида баҳсга киришишади. Ярим финалда ғалаба қозонган жамоалар финалда тўп суришади. Ярим финалда мағлубиятга учраган жамоалар эса учинчи ўрин учун баҳслашишади.

Ўйинлар Фарғона давлат университетининг спорт соғломлаштириш ўйингоҳида (собиқ “Марказий” стадион) бўлиб ўтади. Ўйинлар бошланиш вақти: соат 8:00 ва 10:00.

Ўйинлар катта эҳтимол билан 27 ва 28 май кунлари бўлиб ўтади. Бу борада кейнроқ батафсил маълумот берамиз.

Баҳром Ҳайдаров бошқараётган Фарғона вилоят терма жамоаси сафидан Сардор Мирзаев (“Локомотив”), Павел Смоляченко (“Бухоро”), Иқбол Бобохонов (“Андижон”), Шукурали Пўлатов, Дилёрбек Эрматов (“Нефтчи”) ва Иқбол Маликжонов (“Қўқон-1912”) каби тажрибали футболчилар билан бир қаторда биринчи лига тўп сураётган бир қатор ўйиничилар жой олишган.

Баҳром Ҳайдаров шогирдлари мусобақа ғолиблиги учун кураш олиб боришади. Бу борада вилоятимиз терма жамоасига омад тилаб қоламиз.

Аброр Деҳқонов

"Универсиада-2016": Фарғона терма жамоаси бош соврин учун курашади