Эътиборлиси уларнинг бариси ҳозирча тадбирда иштирок этишга тайёр эканликларини ва Камолиддин учун афсусдалигини билдириб келмоқда.

Бундан 10-12 йил муқаддам Кенжаев эндигина "Насаф"нинг муҳим аъзосига айланиб бораётган пайтда таркибда у билан бирга тажрибали Вали Келдиев ҳам бирга ўйнаган. Бугунги кунда Машъал ёшлар жамоасида мураббийлик қилиб келаётган собиқ футболчи ҳам 29 ноябрь куни тадбирга бажонидил келишга рози эканлигини билдириб ўтди.

- Ҳа, яқинда "СА" сайтида Камолиддин учун хайрия акцияси бўлаётгани ҳақида ўқидим. Унда кўрсатилган телефон рақамини ҳам ёзиб олганман. Албатта имкони бўлса биз ҳам иштирок этамиз. Кенжаев ажойиб йигит эди. Жуда ҳам камтар. Меҳнаткаш ва шу билан бирга хушчақчақ бола бўлган. Ҳозир ҳам тушкунликка тушмасдан, ҳазиллашиб туради. Минг афсуски унинг футболда ва ҳаётда омади келмади. Эндигина "Насаф"нинг муҳим бир аъзосига айланиб бораётганида кутилмаган автофалокат туфайли шундай ҳолатга тушиб қолди.

- Камолиддин "Насаф"да ўйнаган вақтларида кўпроқ мен билан бирга юрарди. У билан муносабатларимиз ҳамиша яхши бўлиб келган. Укамдек бўлиб қолган. Телефон орқали ёки кўришиб гаплашиб турамиз.

- Агарда ташкилотчилар 29 ноябрь куни Тошкентдаги тадбирга таклиф этишса, боришга тайёрман.

Исломбек Рустамбеков суҳбатлашди

Буни ҳамма ўқиши шарт! Камолиддин Кенжаевга ёрдам берамиз, акцияда иштирок этинг!

Вали Келдиев: "Кенжаев "Насаф"да кўпроқ мен билан бирга юрарди"