Жанубий Корея гуруҳда Уммон (1:0), Қувайт (1:0) ва Австралия (1:0) устидан ғалабага эришиб биринчи ўринни эгаллаганди. Чорак финалда корейслар қўшимча таймда Ўзбекистонни 2:0 ҳисобида мағлуб этди.

Ироқ эса "D" гуруҳида Иордания (1:0) ва Фаластинни (2:0) мағлуб этди, Японияга (0:1) ютқазиб қўйди. Чорак финалда 2007 йилги Осиё чемпионлари Эрон билан кечган драматик баҳсда 3:3 ҳисобида дуранг ўйнаб, пенальтилар сериясида зафар қучишди - 7:6.

Ироқ ўз тарихида саккизинчи бор қитъа чемпионати финал босқичида қатнашмоқда. Жамоанинг мусобақадаги энг яхши натижаси 2007 йил қайд этилган. Ўша йил Ироқ қитъа чемпиони бўлган.

Жанубий Корея учун бу йилги мусобақа 13-Осиё Кубоги саналади. Ушбу жамоа 1956 ва 1960 йилларда Осиёда тенгсиз бўлган.

Бу икки жамоа ўзаро 16 марта тўқнаш келган. Корея бугунга қадар Ироқни 5 бор мағлуб этган. 10 марта дуранг қайд этилган ва 1 марта Ироқ зафар қучган. Тўплар нисбатида ҳам корейслар устун - 19:13.

Ушбу жамоалар ҳозирга қадар Осиё Кубогида икки марта тўқнаш келишган. 1972 ва 2007 йиллардаги иккала ўйинда ҳам 0:0 ҳисоби қайд этилган. Пенальтилар сериясида Ироқ икки бор ғолиб бўлган.

Ироқлик Ёсир Қосим чорак финалда Эронга қарши ўйинда мусобақадаги ўзининг иккинчи огоҳлантиришини олди. Шу боис у ярим финалда Жанубий Кореяга қарши майдонга туша олмайди.

Жанубий Корея - Ироқ
26 январь 2015. Сидней. 14:00
Бош ҳакам: Рюжи Сато (Япония)
Қанот ҳакамлари: Тору Сагара (Япония), Тошиюки Наги (Япония)
Тўртинчи ҳакам: Алиризо Фағони (Эрон)

Нарзулла Сайдуллаев

Жанубий Корея - Ироқ. Превью