Odatga ko'ra o'tgan turning ramziy terma jamoasini tuzdik.

Darvozabon
Evgeniy Cheremisin "Neftchi"

Navoiyda mehmon bo'lgan "Neftchi" klubi safarda durang o'ynab qaytdi. Murod Ismoilov jamoasining gol o'tkazib yubormasligida darvozabon Evgeniy Cheremisin katta rol o'ynadi. "Qizilqum" juda ko'plab xavfli vaziyatlar yaratdi va zarbalar yo'lladi, Cheremisin zarbalarning barchasini qaytarishga muvaffaq bo'ldi.

Himoyachilar
Shuhrat Muhammadiev "Nasaf"
Ivan Miloshevich "Bunyodkor"
Jahongir Mehmonov "Neftchi"
Georgiy Kvesieshvili "Qizilqum"

Voha derbisida "Nasaf" qo'shnisi "Mashal"ni 3:0 hisobida taslim qildi. Shu kuni qarshiliklar safida o'ng qanot himoyachisi Shuhrat Muhammadievni to'xtatib bo'lmay qoldi. Terma jamoamiz azosi ikkita golli to'p uzatishni amalga oshirdi.

"Bunyodkor"ning legioner himoyachisi Ivan Miloshevich qo'qonliklarning hujumlarini qaytarishga alohida faollik ko'rsatdi. U havodan uzatilgan to'plarni deyarli barchasini qaytarib turdi.

Farg'onaning "Neftchi" klubi Navoiyda "Qizilqum" bilan durang o'ynab qaytdi. Shu kuni ikkala jamoa himoyachilari yaxshi o'ynashgani uchun ham hisob ochilmadi. Mezbonlar safida Georgiy Kvesieshvili, mehmonlardan Jahongir Mehmonovni ramziy terma jamoaga loyiq deb topdik.

Yarim himoyachilar
Timur Vasilev "Andijon"
Kaxi Maxaradze "Paxtakor"
Nikita Pavlenko "Olmaliq"
Jasur Hasanov (katta) "Lokomotiv"

"Andijon" o'z uyida mamlakat chempioni "Paxtakor" bilan o'ynadi va mag'lub bo'ldi. Shunga qaramay mezbonlar safida yarim himoyachi Timur Vasilev juda faol o'ynadi, raqib himoyachilariga tinchlik bergani yo'q. Shunchaki uni qo'llab quvvatlaydigan sherik topilmadi.

Mana shu o'yinda "sherlar" tarkibida gruziyalik yarim himoyachi Kaxi Maxaradze doimgidek faol o'ynadi. U maydon markazida to'plarni olib qo'yish va hujum boshlashda boshqalarga o'rnak bo'ldi.

"Olmaliq" yarim himoyachisi Nikita Pavlenko "Dinamo" bilan bahsda ikkita gol urishga muvaffaq bo'ldi. Qanot yarim himoyachisi bu yil anchayin mazmunli va samarali o'yin ko'rsatmoqda.

"Lokomotiv" tajribali yarim himoyachisi Jasur Hasanov ham terma jamoadan o'rin oldi. Chap qanotda "Navbahor" himoyachilariga tinchlik bermagan Hasanov bitta gol, ikkita golli pas oshirdi.

Hujumchilar
Shahzodbek Nurmatov "Metallurg"
Marat Bikmaev "Lokomotiv"

"Metallurg" hujumchisi Shahzodbek Nurmatov "Sho'rtan" bilan G'uzordagi o'yinda ancha faol o'ynadi. Aynan u birinchi bo'lim so'nggida hisobni ochdi, ikkinchi bo'lim boshida esa Nurmatov ishlagan penaltidan so'ng ikkinchi gol urildi. So'nggi turlarda ko'p gol urayotgan hujumchining gollari soni 6taga etdi.

"Lokomotiv" o'z uyida "Navbahor"ni 5:1 hisobida mag'lub etdi. Zaxiradan maydonga tushgan Marat Bikmaev namanganliklar darvozasiga ikkita to'p kiritishga muvaffaq bo'ldi. Qizig'i kubok doirasidagi bahsda ham Bikmaev "Navbahor"ga ikkita gol urgandi.

Bosh murabbiy: Rustam Mirsodiqov "Metallurg"

15-turning eng yaxshi murabbiyi sifatida Rustam Mirsodiqovni tanladik. Tajribali murabbiy boshchiligidagi "Metallurg" G'uzorda "Sho'rtan" ustidan 3:0 hisobida g'alabaga erishdi. Umuman olganda Mirsodiqov jamoasi iyun oyidagi 4ta o'yinda 4ta g'alabaga erishdi.

15-tur ramziy terma jamoasi