Яна бир 365 кун ортда қолди. Ким учундир йил сокингина ўтган бўлиши мумкин, аммо футбол мухлислари учун бундай деб бўлмайди. Ўтаётган йил бир қатор қизиқ ва жаҳон футболига таъсир кўрсатган муҳим воқеаларга бой бўлди. Қуйида 2018 йилнинг энг ёдда қолган воқеалари ўнлигини келтириб ўтамиз.

1. Жаҳон чемпионатида VAR синаб кўрилди

Видеотакрорлар футболда биринчи бор шу йил чиққани йўқ. Икки йил олдин футбол ассоциациялари халқаро кенгаши VARни илк бор АҚШда бўлиб ўтган ёшлар ўртасидаги мусобақада синаб кўрганди. Аммо энг катта воқелик шубҳасиз VARнинг жаҳон чемпионатида йўлга қўйилгани бўлди.

Айнан шу технология сабаб айтиш мумкинки, мундиал ҳакамларнинг қўпол хатоларисиз кечди. Тўғри, VAR ўйинни бироз тўхтатиб қўяди, лекин якунда ҳаммаси одилона якун топса яхши эмасми? Эндиликда биз жаҳон чемпионатида ҳакамларнинг Лэмпард Германия дарвозасига тўп киритиб, ҳисобга олинмаганидек хатоларини кўрмаймиз.

Ҳозирда VAR кучли бешликнинг тўрттасида Германия, Италия, Испания ва Францияда қўлланилмоқда. Кейинги мавсумдан эътиборан Англияда ҳам ишлатилади. Шунингдек, Европа чемпионлар лигасининг 1\8 финалидан бошлаб ҳакамлар VAR ёрдамида ўйинларни бошқаришади.

2. Миллатлар лигасининг биринчи мавсуми

УЕФА терма жамоалар ўртасида Миллатлар лигаси мусобақасини ўтказишни мақсад қилганида бу ҳақда кўпчилик хушламаганди. Аммо якунда кўрдикки, ушбу мусобақа ҳам анча қизиқ кечди.

Чунки айнан Миллатлар лигаси туфайли кўплаб зерикарли ўртоқлик учрашувларига барҳам берилди. Мухлислар Европанинг кучли жамоалари иштирокида янгича тўқнашув гувоҳига айланишди. Хуллас бошида таваккал қўл урилган иш ўз самарасини берди. Буни ҳатто ФИФА ҳам тан олди.

3. Модрич Месси ва Роналдунинг гегемонлигига барҳам берди

Якунига етаётган йил нафақат "ўзга сайёраликлар", балки ерликлар ҳам "Олтин тўп"ни олиши мумкинлигини кўрсатиб берди. Хорватиялик Лука Модрич ўта қийин рақобатда Месси ва Роналду гегемонлигига барҳам бериб, ҳақли равишда ушбу совринни қўлга киритди.

Модрич бу мавсум ЕЧЛда ғолиб чиқишдан ташқари жаҳон чемпионати финалида ҳам ўйнади. Факт фактлигича қолади: 2018 йилда Месси ҳам, Роналду ҳам энг кучли бўла олишмади.

4. "Реал"нинг ЕЧЛда кетма-кет учинчи ғалабаси

Мадриднинг "Реал" клубига қойил қолмасдан илож йўқ, чунки бу жамоа кетма-кет учинчи марта Европа чемпионлар лигасида зафар қучди. Албатта, ушбу муваффақиятда Зинедин Зиданнинг ҳиссаси катта. Авваллари мазкур мусобақада қаторасига икки йил чемпион бўлишнинг ўзиёқ бажариб бўлмас вазифага ўхшаб кўринарди.

Аммо "Реал" буни уддалади, ҳатто учинчи марта ютиш мумкинлигини кўрсатди. Киевда кечган финал Муҳаммад Салаҳнинг елкасидан жароҳат олиши, "Ливерпуль" дарвозабони Кариуснинг ўта кулгули хатоси ҳамда Гарет Бэйлнинг "қайчи" усулида киритган голи билан ёдда қолди.

5. Football Leaks суриштируви

Суперлигани ташкил этиш учун олиб борилган махфий музокаралар, ФИФАнинг ПСЖ ва "Манчестер Сити"га кўрсатган ёрдами, Мино Райоланинг молиявий ғирромликлари, Серхио Рамоснинг допинг-тест хулосаси ижобий чиққани, ПСЖ академиясида юзага келган ирқчилик, рус клубларининг молиявий ҳолатига давлат ташкилотларининг аралашуви...

Бу ҳали рўйхатнинг ҳаммаси эмас. Тиниб-тинчимас Football Leaks ходимлари йил давомида бир қатор ҳужжатларни кўтаришга муваффақ бўлишди. Эндиликда ҳамманинг эҳтиёт бўлиб ишлашига тўғри келади.

6. Ҳимоячилар ва дарвозабонлар учун йирик трансферлар

Вақт ўтган сайин футболчиларнинг трансфер суммаси ортиб боряпти. Шу пайтгача асосан ҳужумчилар ва ҳужумкор ярим ҳимоячилар учун катта пуллар тўлаб келингани сир эмас. Лекин бу йил ҳимоячи ва дарвозабонларнинг нархи анча ошиб кетди. Масалан, "Ливерпуль" "Саутгемптон"дан Виржил ван Дейкни олиш учун 75 миллион фунтдан воз кечди.

Бундан ташқари дарвозабон Алиссонни қўлга киритиш мерсисайдликлар учун 63 миллион еврога тушди. Августда яна бир рекорд урилди. Тибо Куртуа "Реал"га ўтиб кетгач, "Челси" 80 миллион евро эвазига Кепа Аррисабалагани сотиб олди.

7. Роналдунинг "Реал"дан кетиши

Чемпионлар лигасидаги ютуқдан сўнг Криштиану Роналду "Реал"дан кетиши мумкинлиги ҳақида шаъма қилганди. Бунга баъзилар ишониб, баъзилар ишонмаганди. Лекин якунда барибир шу воқеа рўй берди: португалиялик юлдуз Мадрид клубини тарк этиб, "Ювентус" билан шартнома имзолади.

Роналдунинг Италияга келиши "А" серияга бўлган қизиқишни оширди дея оламиз. Чунки сўнгги йилларда ушбу чемпионат ўз мавқеини бирмунча пасайтириб юборганди. Роналду тез орада янги жамоаси етакчиларидан бирига айланиб, 18та ўйинда 12та гол уришга муваффақ бўлди.

8. Эронда аёлларнинг футболга киришига рухсат берилди

Эронда аёлларнинг стадионга киришига рухсат бермаслик 39 йил давом этди. Лекин шу йилнинг октябрь ойида ҳукумат ушбу тақиқни қисман олиб ташлашга муваффақ бўлди.

Теҳрондаги "Озоди" стадионида кечган Боливияга қарши кечган ўртоқлик баҳсида 100 нафар аёл-қиз стадионга киритилди ва уларга алоҳида сектордан жой қилиб берилди. Натижада ушбу воқеа ҳам тезда ижтимоий тармоқларда ажойиб янгилик сифатида тарқалди.

9. Учинчи еврокубокни ташкил этиш

Ҳаммамиз ҳафтанинг сешанба-чоршанба кунлари ЕЧЛ, пайшанба куни эса Европа лигаси баҳсларини кўришга ўрганиб қолганмиз. Аммо 2021 йилдан евкубоклар формати бирмунча ўзгаради. ЕЧЛда ҳаммаси қандай бўлса шундайлигича қолади.

Европа лигасида эса жамоалар сони 48тадан 32тага қисқаради ва нисбатан кучсиз жамоалар учун учинчи еврокубок ташкил этилади. Ҳозирча янги мусобақанинг номи маълум эмас, лекин 2019 йилда эълон қилинади. Учинчи еврокубокнинг алоҳида ўз логоти ва регламенти бўлади.

10. Либертадорес Кубоги иккинчи финалининг Жанубий Америкада ўтказилмагани

"Ривер Плейт" ва "Бока Хуниорс" ўртасида кечган Либертадорес Кубогининг иккинчи финали қаерда бўлиб ўтиши кўп муҳокама қилинди. "Бока" майдонида кечган биринчи финал 2:2 ҳисобида якун топганди. Жавоб ўйинини эса салкам бир ой кутишга тўғри келди. "Бока Хуниорс" жавоб баҳси учун йўлга чиққан маҳал жамоа автобуси "Ривер" мухлислари томонидан турли буюмлар орқали "ўққа тутилди".

Натижада ўйин қолдирилди. Шундан сўнг бироз муддат кутишга тўғри келди. Ташкилотчилар нима бўлса ҳам финал Жанубий Америкада ўтказилади дейишди. Аммо якунда барибир ўйин Европага кўчирилди ва ҳар икки жамоа Мадриддаги "Сантьяго Бернабеу" стадионида иккинчи бор ўзаро тўқнаш келди. Бу учрашувда "Ривер"нинг қўли баланд келиб 3:1 ҳисобида ғалаба қозонди ва бош совринни қўлга киритди.

2018 йил жаҳон футболига таъсир кўрсатган 10та муҳим воқеа