Anvar G'ofurov 1982 yilda Samarqandda tug'ilgan. Futbolchilik faoliyatini 2000 yil Jizzaxning "So'g'diyona" jamoasida boshlagan o'yinchi shu kunga qadar "Dinamo", "Paxtakor", "Navbahor", "Mashal", "Bunyodkor" va "Obod" jamoalarida to'p tepgan. 2009 yilda "qaldirg'ochlar" azosiga aylangan himoyachi 2016 yilgacha mazkur jamoa sharafini munosib himoya qildi. Orada malum vaqt ijara asosida "Obod"da harakat qildi va 2017 yilning ikkinchi davrasida qadrdon jamoasiga qaytdi.

G'ofurov 20 yillik faoliyati davomida muxlislar qalbidan o'rin egallay oldi. Futbol ichidagi kishilar OAV nishoniga kamdan kam hollarda tushib qoladigan himoyachini maydonda o'z vazifasini sidqidildan bajaradigan, kamtar inson sifatida tariflaydi.

Toshkentning "Bunyodkor" klubi sobiq bosh direktori Ulug'bek Mirzaev shunday fikrda: "Anvarjon nafaqat yaxshi futbolchi, zo'r inson ham. Biz anchadan beri tanishmiz. Kamtarligi, soddaligi tufayli hayotda bir necha bor aldangan bo'lsa-da, odamiylikni o'z o'rniga qo'yishdan charchamaydi. Unga ajoyib faoliyati uchun minnatdorchilik bildiramiz. Oxirgi yillarda deyarli murabbiylardek fikrlar, raqibning o'yinini tahlil qila olar edi. O'ylaymizki, o'zbek futboli tez orada yana bir murabbiy bilan boyiydi..."

Bundan tashqari, G'ofurov shaxsiyati haqida gap ketar ekan, sadoqat va fidokorlik sifatlarini ishlatmaslik mumkin emas. U faoliyatining oxirgi 11 yilini "Bunyodkor"ga bag'ishladi, jamoani eng qiyin kunlarda ham yolg'izlatib qo'ymadi. Bizdagi malumotlarga ko'ra, Saudiya Arabistonining "Al Ittifoq" va "Al Vahda", Eronning "Persepolis", Tailandning "Muangtong Yunayted" klublaridan ajoyib takliflar olgan universal himoyachi "qaldirg'ochlar"ni tashlab ketishni lozim topmagan. Futbol soat sayin biznesga aylanib borayotgan paytda sadoqatning kuni bitib boryapti. O'zbek futbolida-ku anqoning urug'i! Shunday ekan, yuqorida keltirilgan xorij jamoalarining nomi ham G'ofurov uchun o'rnimizdan turib, qarsak chalishimizga etadi.

Buffon yoki Zlatanni maydonda ko'rib, hayratlanasiz. Malumot uchun, Anvar G'ofur tez orada 39 yoshga qadam qo'yadi. Yurtimizdan chiqqan aksar o'yinchilar 30 ga kirar-kirmas "o'chib" qolayotganini inobatga olsak, bu ham havas qilarli ko'rsatkichdir.

Shu o'rinda saytimiz xodimlari va kuzatuvchilari nomidan Anvar G'ofurovga o'zbek futbolidagi 20 yillik faoliyati, terma jamoadagi o'yinlari va sadoqati uchun minnatdorchilik bildiramiz!

Tepada "Bunyodkor"ning og'ir kunlarida ham jamoa bilan birga bo'lgani haqida yozdik. "Oltin to'p"ning 2003 yilgi g'olibi Pavel Nedvedning shunday fikri bor: "Klub inqirozga uchrasa, futbolchilar va yulduzlar jamoani tashlab ketadi. Faqat odamlar qoladi!"

Umid qilamizki, Anvar G'ofurov tez orada murabbiylik faoliyatini boshlab, futbolimizni o'zidan-da kuchliroq o'yinchilar bilan boyitadi. Halol murabbiy va hakamlari bor o'zbek futboliga faqat odamlar etishmayotgandek...

Faxriddin Ro'ziev, O'zJOKU talabasi

38 yoshda faoliyatini yakunlagan Anvar G'ofurov haqida