Турнинг дастлабки учрашувида тўқнашган "Торино" ва "Фрозиноне" баҳсида мезбонларнинг қўли баланд келди. Голларга бой ўтган беллашувда мухлислар 5та гол кўришди. "Фрозиноне" икки тўп фарқида орқада бораётиб вазиятни ўнглашга эришди, аммо ўйин тугашига яқин Алекс Беренгуер "Торино"га ғалаба келтирувчи голни урди. Мазкур ғалабадан кейин "Торино" 12 очко жамғарган ҳолда 8-ўринга чиқиб олди.

Бугун эса турнинг қолган учта беллашуви ўтказилади. Турнир жадвалининг пастки қисмидан ўрин олган жамоалар баҳсида "Кальяри" "Болонья"ни қабул қилади. Пешқадам "Ювентус" эса "Удинезе"га сафар қилади. Римнинг "Рома" жамоаси эса "Эмполи" меҳмонига айланади.

А Серияда яққол пешқадам бўлиб турган "Ювентус"нинг ғалабали серияси 8 ўйинга етган. ЕЧЛ билан қўшиб ҳисоблаганда эса Аллегри жамоаси 10 ўйиндан буён тенгсиз бўлиб турибди. Туринликларнинг рақиби "Удинезе" ҳақида тўхталадиган бўлсак, Хулио Велазкез шогирдлари ҳозирча 2 ўйинда ғалабани тантана қилишган. Жамоа 8 очко тўплаган, тўплар нисбати ҳам 8-8 кўринишда. Турнир жадвалида эса "Удинезе" 14-поғонани банд этиб турибди.

"Удинезе" таркибида юлдуз Родриго де Пауль. Аргентиналик ярим ҳимоячи жорий мавсумда жамоанинг асосий етакчисига айланган. Родриго де Пауль 3та гол урган ва жамоанинг тўртта голига ассистентлик қилган. Бугунги баҳсда ҳам "Ювентус" ҳимоячиларига энг катта хавф айнан Родриго де Паулдан келиши эҳтимоли юқори.

"Ювентус" юлдузи Роналду аста-секин А Серияга кўникиб бормоқда. Португалиялик футболчи охирги ўйинларда 3та гол урди ва жамоанинг 4та голига ассистентлик қилди. Дибала ҳам охирги ўйинларда голлар сериясини очиб юборди. Хедира ва Ругани эса жароҳат олиб лазаретдаги рўйхатни тўлдиришди. Маълум муддат ҳордиқ чиқарган Кьеллини ва Канселу эса яна жангга қайтишмоқда. Эмре Жан эса яна бир бор марказда ўйнаш имкониятини қўлга киритиши мумкин.

Қизиқ факт: "Удинезе" учун "Ювентус"нинг ғалабали серияларига чек қўйиш янгилик эмас. Бунга қадар жамоа 2016 йили туринликларнинг уйдаги мағлубиятсиз серияга барҳам беришганди. Бугун ҳам жамоа "Ювентус"нинг ғалабали сериясига "нуқта" қўйишга уриниб кўриши аниқ.

Бош ҳакам: Розарио Абиссо

"Удинезе": Скуффет; Самир, Нюйтинк, Труст-Эконг, Ларсен; Бехрами, де Пауль, Мандрагора, Фофана, Пуссетто; Лазанья

Жароҳатланганлар: Баду (20 кун), Ингельссон (20 кун), Балич (7 кун)

"Ювентус": Щенсни; Алекс Сандро, Кьеллини, Бонуччи, Канселу; Жан, Пьянич, Матюиди, Дибала; Роналду, Манджукич

Жароҳатланганлар: Спинаццола (30 кун), Ругани (20 кун), Хедира (2 ҳафта)

Дисквалификация: Дуглас Коста (1 ўйин)

Турнинг қолган ўйинлари эртага бўлади. Унда чемпионат тўпурари Кшиштоф Пентек ўйнаётган "Женоа" "Парма"ни синовдан ўтказади. "Милан" эса ҳали ғалаба таъмини татиб кўрмаган "Кьево" билан ўзаро баҳслашади. Турнинг эътиборга молик баҳси Римда ўтказилади. Ўтган тур чемпионатда "Рома"дан енгилган, Европа лигасида эса "Айнтрахт"дан йирик ҳисобдаги мағлубиятга учраган "Лацио" мавсумни ажойиб ўтказаётган европанинг энг ёш жамоаси "Фиорентина" билан тўқнашади. "Аталанта" эса ўз уйида "Сампдория"ни меҳмон қилади. Карло Анчелотти бошқарувидаги "Наполи" эса "Ювентус"дан учралган мағлубият аламини "Сассуоло"дан олишга уриниб кўради. Турни якунловчи баҳсида "Спал" ҳамда "Интер" ўзаро куч синашади.

А Серия: "Ювентус"ни ким тўхтатади? (превью)